DILI, 29 jullu 2021 (TATOLI)—Prezidente Bee Timor, Empreza Públika (BTL, E.P), Carlos Peloi dos Reis, klarifika, razaun bee-moos la sai kuaze semana rua iha suku Becora, hahú hosi Becusi kraik no sentru tanba iha koneksaun ilegál, tanba ne’e ekipa téknika hahú normaliza hikas.
“BTL la’ós lakohi loke bee ba komunidade Becuse no laiha intensaun taka bee ba populasaun, maibé loke bee halo nusa, se bee iha tanki rezervatóriu laiha. Ita-nia oknum komunidade lubuk ne’ebé hela besik mota Becuse halo ligasaun ilegál ba kanu transmisaun hodi kauza bee la sa’e ba reservatóriu. Tanba ne’e, ha’u orienta diretór operasionál no manutensaun atu halo limpeza koneksaun ilegál sira,” Prezidente BTL, E.P, hateten ba Agência TATOLI, iha ninia knaar fatin, kinta ne’e.
Ligasaun ilegál afeta bee sa’e iha tanki rezervatóriu nune’e labele halo distribuisaun ba populasaun, enkuantu ligasaun direta ba kanu transmisaun, ninia impaktu mak bee la sa’e ba reservatóriu no komunidade barak sai vítima.
“Desde loron hirak liubá tékniku sira halo esforsu hakotu no hadi’a ligasaun ilegál sira, nune’e bee hosi bomba bele tama fali rezervatóriu,” nia akresenta.
Bainhira tékniku sira halo limpeza ligasaun ilegál sira, komunidade ne’ebé durante ne’e komete aktu ne’e lakohi koopera.
“Tanba sira-nia interese BTL sobu, maibé ekipa kontinua hala’o servisu nune’e bele fornese hikas bee-moos ba komunidade iha área refere,” nia hatutan.
Maski nune’e, pupulasaun ne’ebé durante ne’e la hetan bee koopera di’ak ho ekipa BTL hodi hamoos ligasaun ilegál sira.
Tanba ne’e, Prezidente BTL, E.P husu ba populasaun sira ne’ebé sai vítima atu pasiénsia tanba hafoin tékniku sira halo manutensaun hotu bele fornese hikas bee.
Jornalista : Antónia Gusmão
Editora : Julia Chatarina
