Kankru ran hamate ema na’in-haat iha klínika Bairru-Pité

DILI, 02 agostu 2021 (TATOLI)—Hahú hosi tinan 2017 to’o 2020, klínika Bairru-Pité, rejista pasiente kankru ran na’in 28 no na’in-haat mak mate.

“Pasiente ne’ebé durante moras kankru ran hamutuk 28 no na’in-haat mak lakon vida. Agora daudaun na’in 22 mak ativu halo tratamentu no na’in rua mak lakon kontaktu,” Diretór klínika Bairru-Pité, Inácio dos Santos,  hateten ba jornalista-sira iha klínika Bairru-Pité, segunda ne’e.

Notísia relevante:Klínika Bairru-Pite izola pasiente tuberculose 22, mate ida

Diretór esplika, pasiente na’in-rua ne’ebé lakon kontaktu ne’e maihosi Kribas, Manatuto no númeru kontaktu lakon, signifika númeru la ativu, laiha posibilidade no difikulta tebes atu buka-tuir.

Alende ne’e, pasiente ida seluk mai hosi munisípiu Covalima mós hanesan, labele buka-tuir tanba númeru kontaktu la ativu.

“Entaun pasiente na’in 22 ne’ebé ativu hela ba tratamentu mai hosi munisípiu Aileu na’in-rua, Baucau na’in-rua, Covalima na’in-rua,  Viqueque na’in-ida, RAEOA na’in-ida no restu ne’e hosi Dili,” nia dehan.

Pasiente na’in 22 ne’e mós detektadu no transfere hosi Ospitál Nasionál Guido Valadares, no iha pasiente na’in-rua mak konsege ba halo diagnóstiku iha Bali,  na’in-rua iha Singapura.

“Sira na’in  28  ne’ebé ita rejista ho tipu kankru Chronic Myeloid Leokimia. Entaun, iha pasiente ida mak ita suspeita hela, tanba pasiente sira-ne’e maioria idade 30 to’o 40 ba leten, inklui labarik kiik na’in-tolu hosi idade 15 to’o tinan neen mak sofre mós moras ida-ne’e,” nia subliña.

Iha progresu tratamentu ba pasiente kankru ran, diak  hotu tanba husu nafatin atu kontinua konsumu  ai-moruk to’o di’ak.

Jornalista: Felicidade Ximenes

Editór: Cipriano Colo