DILI, 12 agostu 2021 (TATOLI)-Negosiante sira ne’ebé fa’an tais iha Merkadu Tais, Colmera, Dili, susar tebes hetan rendimentu iha situasaun pandemia COVID-19.
Lourença Gonçalves ho Angela Mesquita Fernande, nu’udar negosiante tais iha Merkadu Tais, Colmera, kinta ne’e, fó sasin katak, molok pandemia COVID-19, sira hetan rendimentu di’ak, maibé agora mosu COVID-19 aumenta tan ho Estadu Emerjénsia no Serka Sanitária prejudika maka’as rendimentu.
“Antes seidauk COVID-19, tais no sasán tradisionál hanesan mamolik mortel, belak no seluk ne’ebé ami fa’an folin tanba ema estranjeiru barak mak tama mai sosa, maibé agora mosu COVID-19 ema estranjeiru barak mak fila ba sira-nia rai no ita-nia maluk balu sosa, maibé depende ba halo lia,” Lourença Gonçalves hateten ba Agência Tatoli.
Iha situasaun normal, negosiante tais sira iha Merkadu Tais kada loron bele hetan rendimentu entre $60.00 to’o $80.00, maibé Lourença ho nia belun Angela Mesquita dehan, iha situasaun pandemia COVID-19 ne’e atu hetan de’it $10.00 difisil tebes.
“Loron tomak ami fa’an vizitante laiha, ema ne’ebé mai hola tais bainhira halo lia,” Angela Mesquita subliña tan.
Nia afirma, tais sira ne’ebé sira fa’an maioria hosi Ermera, maibé agora Munisípiu Ermera rasik aplika konfinamentu obrigatóriu no serka sanitária ne’ebé tais mós agora la tama.
Tuir observasaun Agência Tatoli iha terrenu nota, maske vizitante ba tais Market menus maibé negosiante sira kumpre nafatin protokolu prevensaun COVID-19 nian, hanesan uza máskara prepara bee ho sabaun no kumpre distansiamentu fíziku.
Jornalista : Arminda Fonseca
Editór : Francisco Simões
