Pesoál saúde na’in-lima iha Guisarudo pozitivu COVID-19

ERMERA, 13 agostu 2021 (TATOLI)—Pesoál saúde hamutuk na’in-lima iha Sentru Saúde komunitária Guisarudo, postu adminsitrativu Hatulia B, pozitivu COVID-19, nune’e fó impaktu ba atendimentu saúde iha sentru saúde ne’e.

Pesoál saúde na’in-lima ne’e submete ba teste swab iha loron tolu liu bá, no rezultadu pozitivu tanba antes ne’e sira partisipa enkontru iha Ermera Vila.

Notísia relevante:Vasina iha Ermera persentajen kiik liu

Xefi Sentru Saúde komunitaria Guisarudo, Maria Magdalena Mali, hateten ba jornalista-sira iha Guisarudo, sesta ne’e.

Sira ne’ebé pozitivu ne’e iha médiku na’in-ida, parteira na’in-ida, resepsionista na’in-rua no saúde públika na’in-ida.

“Sira na’in-rua mak izola iha sentru saúde ida-ne’e  no na’in-tolu izola iha munisípiu Ermera, tanba ami sira ne’e sei swab hotu. Bainhira rezultadu pozitivu  hotu, sentru saúde sei taka,” nia hateten.

Kona-bá impaktu ba atendimentu iha sentru saúde ne’e, Vise Ministru Saúde, Bonifácio ‘Maucoli’ dos Reis, hateten parte Ministériu oras ne’e halo hela rekrutamentu ba internatu no sei apoia rekursu umanu mai tán iha sentru saúde Guisarudo, nune’e nafatin fó atendimentu ba komunidade.

Totál pesoál saúde ne’ebé hala’o serbisu iha sentru saúde Guisarudo hamutuk na’in 12, hanesan médiku iha na’in-haat,  parteira  na’in-haat  no  enfermeiru na’in-haat.

Jornalista: Felicidade Ximenes

Editór: Cipriano Colo