iklan

NASIONÁL, COVID-19, DILI, HEADLINE, SAÚDE

Taxa insidénsia COVID-19 TL sa’e ba 11,2 iha semana ikus

Taxa insidénsia COVID-19 TL sa’e ba 11,2 iha semana ikus

Profisionál saúde prepara vasina AstraZeneca, iha sentru saúde, kuarta (21/07/21). Imajen Tatoli/António Gonçalves.

DILI, 16 agostu 2021 (TATOLI)—Tuir buletin epidemilójika, taxa insidénsia COVID-19 iha Timor-Leste (TL), iha seman ikus, sa’e ba 11,2/100.000 populasaun kompara ho semana kotuk 6,1/100.000 populasaun.

“Taxa notifikasaun diária nia média  iha TL, durante loron 7 liu ba hosi 09 agostu – 15 agostu, 2021, ne’ebé mak sa’e  11.2/100.000 populasaun iha kada loron, kompara ho kazu 6.1/100.000 populasaun kada loron, iha periúdu relatóriu anteriór,’’ dadus buletín epidemiolójika ne’ebé Tatoli asesu, segunda ne’e.

Notísia relevante:COVID-19: óbitu ida no pozitivu 142

Taxa notifikasaun nian ba iha munisípiu hotu-hotu durante loron 7 ikus liu, ne’e relata tuir insidénsia COVID-19 nian mós aumenta ona iha Aileu, Ainaro, Baucau, Bobonaro, Covalima, Dili, Liquiça no RAEOA, kompara ho relatóriu anteriór.

Taxa ba teste pozitividade durante semana kotuk, teste iha Laboratóriu HNGV no Laboratóriu Nasionál Saúde hosi Dili hamutuk 3,842/679 ka 17.7% mak pozitivu kompara ho 8.2% iha periúdu relatóriu anteriór.

Iha Baucau, teste hamutuk  506/29 ka 5.7% mak pozitivu durante iha semana liu bá kompara ho 3.3% iha periúdu relatóriu anteriór.

Iha Covalima, teste hamutuk 92/10 ka 11% mak pozitivu durante iha semana liubá kompara ho 13% iha periúdu relatóriu anteriór.

Iha Ermera, teste hamutuk 387/182 ka 47% mak pozitivu durante iha semana liu bá kompara ho 36% iha periúdu relatóriu anteriór.

Teste maioria hala’o iha Laboratóriu Nasionál  Saúde. Iha Maliana, teste hamutuk 250/38 ka 15%  mak pozitivu durante iha semana liu bá.

Iha RAEOA, teste hamutuk 253 /53 ka 21% mak pozitivu durante iha semana liu bá. Iha Viqueque, teste hamutuk 70/4 ka 6% mak pozitivu durante iha semana liu bá kompara ho 12% iha periúdu relatóriu anteriór.

To’o 15 agostu 2021, vasina COVID-19 nia doze dahuluk hamutuk 340.703 mak administra ona, iha Timor-Leste, reprezenta 45.1% hosi populasaun ne’ebé elijível ho idade 18 ba leten.

To’o 15 agostu 2021, ema hamutuk 127.600 mak simu ona sira nia doze daruak  ba vasina COVID-19 nian, iha Timor-Leste, reprezenta 16.9% hosi populasaun-sira ne’ebé elijível ho idade 18 ba leten.

Maizumenus 49% hosi ema-sira ho idade 18 ba leten ne’ebé hela iha Dili, simu ona sira nia doze segundu ba vasina COVID-19 nian.

Númeru kazu COVID-19 nian iha Timor-Leste ne’e aumenta sa’e ona, no iha posibilidade katak sei aumenta liutan, ho transmisaun rápidu hosi COVID-19 nia variante Delta.

Iha populasaun ne’ebé ho kobertura a’as ba vasina, provavelmente ida ne’e sei maioria rezulta kazu kmán. Maski nune’e, iha risku a’as tebes ba kazu grave no mate, ba ema sira ne’ebé seidauk simu vasina kompletu.

Vasinasaun mak estratejia ne’ebé mais importante, hodi redús impaktu COVID-19 iha Timor-Leste adultu hotu-hotu ne’ebé mak seidauk simu vasina tenke ba simu lalais sira nia doze dahuluk, bainhira posivel.

Vasina nia doze daruak  ne’e nesesáriu hodi fornese protesaun di’ak, liu-liu hodi kontra COVID-19 nia variante Delta.

Vasina AstraZeneca nia doze ida  redús risku ba hospitalizasaun hosi moras COVID-19 grave, to’o 71%.

Vasina AstraZeneca nia doze  rua hatudu ona redusaun ba risku hospitalizasaun hosi moras COVID-19 grave, to’o 92%.

Importante tebes atu implementasaun ba vasinasaun ne’e hasa’e liu tan iha munisípiu sira ne’ebé ho kobertura vasina nian mínimu, inklui Ermera, Ainaro, Aileu no Liquiça.

Aleinde ne’e ema hamutuk 30 ne’ebé mak mate ona ho COVID-19 durante ne’e maioria seidauk simu vasina.

Jornalista: Felicidade Ximenes

Editór: Cipriano Colo

iklan
iklan

Leave a Reply

iklan
error: Content is protected !!