DILI, 17 agostu 2021 (TATOLI)—Reprezentante Povu iha uma fukun Parlamentu Nasionál (PN) husu Governu selu reklamante Cesta Bázika tanba ema barak seidauk simu.
Notísia Relevante: Governu ezekuta ona fundu COVID-19 millaun $94,1
“Ha’u preokupa ezekusaun Fundu COVID-19, liu-liu kona-ba Cesta Bázika sei iha reklamante 13.600 mak seidauk hetan sira-nia direitu,” Deputada Bankada CNRT, Maria Fernanda Lay, levanta liuhosi plenária, tersa ne’e.
Eis Prezidente Komisaun C (Finansa Públika) ne’e haktuir, uluk nia ejize atu Governu aselera maibé Governu argumenta tanba COVID-19 entaun labele selu.
“Agora problema saida tán. Ita agora iha fulan-agostu ona, balun selu ona no balun seidauk,” nia dehan.
Nia hatutan, subsídiu liña frente sira to’o agora seidauk halo pagamentu, entaun oinsá ho progresu relatóriu fundu COVID-19 trimestre daruak nian.
“Ha’u hakarak hato’o katak iha-ne’e rúbrika ba transferénsia nia ezekusaun foin 41%, enkuantu ba bens no serbisu atinje 19,26%. Ne’e to’o fulan-jullu de’it. Ha’u la hatene to’o agostu ami seidauk asesu hosi portal transferénsia,” nia haktuir.
Deputada Maria Fernanda Lay preokupa ezekusaun fundu COVID-19 hosi Ministériu Solidariedade Sosiál no Inkluzaun (MSSI) ne’ebé kiik looos.
“Ha’u husu Governu tau matan tanba osan iha rúbrika fásil liu atu uza mak transferénsia públika,” nia fó hanoin ba Governu.
Jornalista : Evaristo Soares Martins
Editór : Cancio Ximenes
