DILI, 17 agostu 2021 (TATOLI)—Vise Ministru Adiministrasaun Estatál (MAE), Lino de Jesus Torrezão informa, segunda ne’e MAE simu dadus reklamante hosi komunidade iha Aldeia Ramelau, Suku Manleuana, Postu Administrativu Don Aleixo, Munisípiu Dili, hamutuk 24, ne’ebé to’o agora seidauk simu Cesta Bázika.
Notísia Relevante: Reklamante rihun 25-resin sei simu cesta bázika iha fulan ne’e
“Horisehik, ha’u simu dadus reklamante hosi Aldeia Ramelau, iha xefe família hamutuk 24 mak to’o agora seidauk simu Cesta Bázika. Dadus ne’ebé ha’u simu tiha ona, ha’u tenke fó fila-fali ba Prezidente Autoridade Munisípiu (PAM) Dili, tanba ida-ne’e ninia kompeténsia,” Vise Ministru Administrasaun Estatál (MAE) ne’e hateten ba Agência TATOLI, liuhosi telefónika, tersa ne’e.
Dadus reklamante hirak ne’e, nia dehan, komunidade entrega direta ba MAE mak sei fó fali ba PAM ka Administradór Munisípiu (AM) sira hodi hamatan.
Entretantu Xefe Suku Caicoli, Postu Administaivu Vera Crús, Munisípiu Dili, Hipólito Marques Sarmento, hateten to’o agora nia parte seidauk simu informasaun kona-ba atribuisaun Cesta Bázika ba reklamante sira.
“Ami seiduak simu informasaun kona-ba atribusaun Cesta Bázika maibé ha’u rona dehan apoiu umanitária ne’e aprova. Signifia katak, reklamante sira sei iha direitu atu simu Cesta Bázika ne’e,” Xefe Suku ne’e hateten.
Bainhira mak simu, nia dehan, ida-ne’e kompeténsia ministériu relevante sira-nian tanba to’o agora autoridade lokál seidauk simu informasaun kona-bá asuntu ida-ne’e.
Tanba ne’e, nia husu ba reklamante sira atu hein ho pasiénsia tanba direitu atu simu Cesta Bázika ne’e sei la lakon tanba desizaun ne’e Governu aprova ona.
Notísia Relevante: Implementasaun Cesta Bázika fó efeitu pozitivu ba agrikultór
Jornalista : Osória Marques
Editór : Cancio Ximenes
