DILI, 20 agostu 2021 (TATOLI)—Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál, Lere Anan Timur, konsidera komemorasaun loron Forsa Armada Libertasan Nasionál Timor-Leste ba dala 46 importante tebes, hodi fó omenajen ba erói sira tanba halo marsa erói naruk ida ba liberdade no idependénsia.
“Ita hanoin hikas no hahi membru hotu-hotu hosi komité sentrál Fretilin ne ‘ebé proklama kriasaun FALINTIL iha 1975. Fó omenajen espesiál ba sira, tanba eroi sira ne’e hahú marsa naruk ida ba ita-nia liberdade no independénsia,” Lere Anan Timur, hateten iha ámbitu komemorasaun ne’ebé hala’o iha kuartél Jenerál, Fatuhada, sesta ne’e.
Notísia relevante:Komandu F-FDTL halo promosaun diviza ba membru na’in 19
Lere Anan Timur mós hato’o kumprimentus espesiál ba kamarada-sira iha luta armada, iha situasaun difísil no dala barak, iha tempu rezisténsia ne’ebé ohin loron kontinua nafatin, ho dignidade, patriotizmu no sentidu misaun nian ne’ebé makás, hodi afirma Timor-Leste hanesan razaun ba sira-nia moris.
Agradese no hato’o rekoñesimentu espesiál ba militár F-FDTL , ne’ebé hanesan mós gerrilleiru FALINTIL sira, hanesan ezemplu no rekoñesimentu atu transmite ba jerasaun foun militár-sira, hodi kontinua dedika-an atu kontribui ba dezenvolvimentu no konsolidasaun Estadu.
Iha serimónia ne’e hala’o mós promosaun diviza ba membru F-FDTL na’in 19 ne’ebé konklui ona kursu iha Xina no Japaun.
Partisipa iha serimónia ne’ e, Prezidente Parlamentu Nasionál, Prezidente Tribunál Rekursu, Prokuradór Jerál Repúblika, Vise-Primeira Ministra, Ministru Defeza, Komandante Jerál PNTL, veteranu, diplomata, parseiru dezenvolvimentu-sira, membru Governu no membru Parlamentu Nasionál.
Jornalista: Nelson de Sousa
Editór: Cipriano Colo
