DILI, 23 agostu 2021 (TATOLI)—Informasaun ne’ebé Diretór Nasionál Serbisu Apoiu Ospitalár, Nilton da Silva simu hosi ekipa médiku iha sentru izolamentu Vera Crus katak, hafoin hetan tratamentu no observasaun durante loron haat ba doutór Sérgio Lobo, klínikamente iha progresu di’ak.
“Hosi loron ba loron klínikamente iha ona mudansa bazeia ba sinál vitál no mós responde ba tratamentu tantu medikamentu no ventiladór ne’e rasik. Maski neneik maibé progressu iha sinál ne’ebé di’ak,” Diretór Nasionál Serbisu Apoiu Ospitalár, Nilton da Silva, hateten iha knaar fatin Caicoli, segunda ne’e.
Notísia relevante:COVID-19, RAEOA rejista óbitu ida no ativu 124
Antes ne’e, doutór Sérgio Lobo ho istória moras komorbilidade ne’ebé infetadu mós COVID-19, maibé parte junta médika halo ona diskusaun atu transfere ba rai-liur.
“Ami haree kondisaun klinikamnete iha Vera Cruz no ita koko atu fó atendimentu tuir ita-nia kondisaun no mós ita-nia espesialista-sira,” nia hateten.
Nune’e mós Padre Juvito do Rego, ne’ebé hala’o tratamentu iha izolamentu Lahane, to’o agora kondisaun di’ak tanba hetan atendimentu másimu hosi profisionál saúde-sira.
Pesoál saúde ne’ebé fó atendimentu ba pasiente COVID-19 iha izolamentu Vera Cruz no Lahane hamutuk 49 kompostu hosi médiku, parteira no enfermeiru.
Jornalista: Felicidade Ximenes
Editór: Cipriano Colo
