DILI, 24 agostu 2021 (TATOLI)—Ministériu Saúde (MS) liuhosi Diresaun Nasionál Saúde Mentál, oferese treinamentu psikososiál báziku ba pesoál saúde sira ne’ebé durante serbisu makás hodi tau-matan ba komunidade ne’ebé infetadu ba COVID-19.
Orientasaun ida-ne’e, bazeia ba abilidade psikososiál báziku, hanesan guia ida atu responde ba COVID19, ne’ebé oras ne’e númeru aumenta makás hosi loron ba loron.
Notísia relevante:Governu aprova suplementu remuneratóriu ba linã frente $5-$25 kada loron
“Iha tempu pandmeia COVID-19, dalaruma ita enfrenta problema barak, dalaruma iha uma ho família no mai iha serbisu fatin kontinua hasoru problema. Entaun, ita-nia emosaun sira-ne’e aumenta no la kontrola. Tanba ne’e, ho formasaun ne’e atu bele tulun maluk sira ne’ebé serbisu iha liña oin, hodi ajuda fó hela estratejia balun oinsá halo ekilibriu ba problema,’’ Diretór Saúde Públika, Ministériu Saúde, Carlito Correia Freitas, hateten iha ámbitu formasaun durante loron rua, iha otél Novo Turizmu, tersa ne’e.
Nune’e mós konsultór ba moras la hada’et hosi Organizasaun Mundiál Saúde (OMS), Tshering Dhendhup, hateten durante fulan 18 nia laran, TL enfrenta situasaun ida ne’ebé difísil, halo ema barak preokupa ho situasaun ne’e, tanba médiku barak mós infetadu, no TL rasik presija tempu atu rekopera hosi situasaun ne’e.
Psikólogu klínika iha HNGV, Idalina Borges, hateten treinamentu psikososiál ba profisionál saúde-sira atu orienta abilidade báziku primeiru sokoru psikolojiku ba liña frente-sira ne’ebé daudaun ne’e hasoru situasaun dilemátiku perante COVID-19 iha TL.
Totál profisionál saúde ne’ebé partisipa iha treinamentu psikososiál báziku hamutuk 45.
Jornalista: Felicidade Ximenes
Editór: Cipriano Colo
