DILI, 25 agostu 2021 (TATOLI)—Sentru Formasaun Polísia (CFP sígla portugés) iha Akademia Polísia Nasionál Timor-Leste (PNTL), Comoro, sei kapasita komandante eskuadra ho membru-sira hamutuk 1.200 iha territóriu tomak.
Komandante CFP, Superintendente Xefe, Arquimino B. L. Ramos, hateten kapasitasaun ne’e sei realiza tanba hetan orientasaun hosi Komandu Jerál hodi bele halo preparasaun ba eleisaun prezidensiál oinsa membru hotu-hotu profisionál liu-tán ba atuasaun iha terrenu.
Notísia relevante:Komandu PNTL kontinua aposta formasaun ba polísia feminina
Formasaun ne’e sei foka liu kona-bá ba lei, uza forsa no direitu umanu, ne’ebé sei ko’alia kona-bá jestaun lideransa ho matéria oinsa halo planu jerál, lidera operasaun ho ezekusaun iha komunidade no legalidade uza forsa proporsionál, akontabilidade tuir nesesidade.
“Formasaun ne’e antes la’o tiha ona iha munisípiu lima no agora kontinua ba munisípiu ualu ne’ebé sei partisipa hosi komandante eskuadra ho membru 1.200,” Arquimino Ramos, hateten ba jornalista-sira iha Sentru Formasaun Polísia, Comoro, kuarta ne’e.
Tuir planu, kursu ne’e sei hahú iha 06 setembru tinan ne’e, ho durasaun semana rua ba komandante no semana ida ba membru-sira, ne’ebé sei hetan teoria no prátika.
Formadór hosi sentru akademia mak sei tun direta ba munisípiu ida-idak hodi fó formasaun no tarjetu CFP katak, antes eleisaun prezidensiál, membru PNTL ne’ebé daudaun iha 4.104 hotu-hotu tenke hetan ona formasaun.
Jornalista: Nelson de Sousa
Editór: Cipriano Colo
