DILI, 25 agostu 2021 (TATOLI)—Durante ne’e parte seguransa la konsege trava movimentu ilegál tanba kestaun limitasaun ekipamentu atu detekta no mós distánsia entre postu seguransa-sira iha fronteira Terrestre dook tebes.
Komandante Operasaun Nasionál, Superintendente Xefe, Pedro Belo, fó-sia asuntu ne’e ba jornalista-sira iha Sentru Formasaun Polísia, Comoro, hafoin sorumutu avaliasaun serbisu liu-liu ba implementasaun diretivu-sira ne’ebé durante ne’e Komandu hatún ba iha munisípiu ho unidade-sira no avaliasaun ba seguransa iha fronteira, hodi haree frakeza, forsa ho oportunidade.
Notísia relevante:PM hakarak koloka Forsa Armada iha fronteira terrestre
“Frakeza maioria iha fronteira maka ita-nia postu ne’ebé estabelese ho membru kolokadu natón, nune’e ho distánsia hosi postu ida postu seluk dook tebes ho tán limitasaun ekipamentu labele kobre. Tanba ne’e, dala barak sidadaun-sira ultrapasa ilegál hosi fronteira,” Pedro Belo, hateten.
Ho ida ne’e maka, ikus-ikus ne’e sidadaun barak ultrapasa fronteira ho ilegál, bainhira to’o iha Atambua-Indonézia mak detein, hodi deporta mai territóriu nasionál.
Limitasaun rekursu natón no distánsia hosi postu ida postu seluk dook tebes la’o to’o kilómetru 12,15,25 no limitasaun ekipamentu transporte, nune’e difikulta atu kontrola totál.
Komandu hato’o ona preokupasaun sira ba ministériu tutela no hein tempu tuir-mai bele responde ho nene’ik, kria kondisaun hodi kontrola di’ak liu-tán fronteira.
“Kestaun fronteira la’os polisía nian de’it maibé politiku sira presiza tau atensaun ho kondisaun, nune’e asegura di’ak liu-tán,” nia subliña.
Maski ho kondisaun limitadu, maibé PNTL liu-hosi Unidade Patrullamentu Fronteira (UPF), kontinua firme ho espíritu boot kontinua asegura kada loron, halo mós detensaun ba movimentu ilegál-sira.
Kona-bá deklarasaun Primeiru Ministru (PM), Taur Matan Ruak nian atu troka UPF iha fronteira ba F-FDTL, Pedro Belo, hateten PNTL implementa de’it bainhira desizaun iha ona, hodi kumpre, maibé to’o agora Governu nafatin fiar PNTL hodi asegura fronteira.
Antes ne’e, Portavoz, Komandu Jerál PNTL, Superintendente Xefe, Arnaldo Araújo, hateten PNTL identifika fatin haat sai pontu movimentu ilegál iha fronteira kompostu hosi rai maran tolu no tasi ida, rai-maran liu hosi fatin tolu mak hanesan Fatumean, Lamak Neen, Turiskai no hosi Tasi.
Estratéjia Komandu Jerál maka foin lalais hatún ona orientasaun ba komandu munisípiu Bobonaro ho Covalima no unidade balun atu reforsa UPF, hodi kombate atividade ilegál.
Partisipa iha avaliasaun ne’e maka Komandante Jerál Polísia Nasionál Timor-Leste (PNTL), Komisáriu, Faustino da Costa, akompaña hosi segundu Komandante, Mateus Fernandes, hamutuk ho komandante munisípiu no unidade hotu-hotu.
Jornalista: Nelson de Sousa
Editór: Cipriano Colo
