BOBONARO, 28 agostu 2021 (TATOLI)—Polísia Nasionál Timor-Leste (PNTL) liuhosi operasaun konjunta, detein tan Grupu Arte Marsiál (GAM) na’in-24, ne’ebé hakat ilegál fronteira terrestre hosi Atambua, Nusa Tenggara Timur, Indonézia, bá suku Cova, postu administrativu Balibo,munisípiu Bobonaro.
“Ita-nia sidadaun sira ne’e hamutuk na’in-24, hanesan membru arte marsiál Persaudaraan Setia Hati Terate (PSHT). Ema hosi Ermera na’in-17 inklui feto ida iha laran no hosi Bobonaro ema na’in-hitu,” Komandante Unidade Patrullamentu Fronteira (UPF), Superintendente Euclides Belo, hateten, liuhosi nota ne’ebé Agência TATOLI asesu, sábadu ne’e.
Notísia relevante: Autoridade seguransa Indonézia deporta timoroan 352 mai TL
Detein na’in-tolu iha área Korluli, sesta horiseik (27/08) iha tuku 16:00 lorokraik, na’in-lima detein iha postu UPF oin liuhosi servisu cek point, iha kalan boot detein ualu iha área postu UPF Derok-ren, no tuku 04:00 madrugada detein ualu iha fatin hanesan.
Aleinde ne’e, membru Unidade Espesiál Polísia (UEP) detein sidadaun haat, kompostu hosi feto ida no mane tolu ne’ebé halo atividade transasaun ilegál hanesan sasán kontra bandu, iha área fronteira Mota Malibaka, suku Tapo-memo, postu administrativu Maliana, munisípiu Bobonaro.
“Sidadaun hirak ne’e, daudaun ne’e PNTL halo ona prosesu identifikasaun no bainhira konklui sei entrega ba parte Servisu Saúde Bobonaro hodi transporta tama kuarentena durante loron 14 iha fasilidade saúde ne’ebé Governu prepara, hafoin submete filafali ba prosesu administrativa no kriminál,” Komandante UPF esplika.
Autoridade seguransa Indonézia deporta sidadaun na’in-76 mai imigrasaun Timor-Leste, iha sesta (27/08) maizumenus tuku 15:00 lorokraik no daudaun ne’e parte saúde submete hotu ona ba kuarentena iha Jináziu Maliana.
Tuir Dekretu Governu númeru 18/2021 loron 01 jullu kona-ba medida ezekusaun deklarasaun Estadu Emerjénsia efetua hosi Dekretu Prezidente Repúblika númeru 39/2021 30 juñu, iha artigu 7 hateten, obrigatóriu kontrola sanitária, ne’ebé ba individuu ne’ebé tama sai teritóriu nasionál liu dalan ilegál, sei selu koima ho valór mínimu $30 no másimu $250.
Jornalista : Sérgio da Cruz
Editora : Julia Chatarina
