iklan

BAUCAU, HEADLINE, MUNISÍPIU, NASIONÁL, POLÍTIKA

Prezidente Konsellu Kombatente Baucau husu líder nasionál unidade

Prezidente Konsellu Kombatente Baucau husu líder nasionál unidade

Veteranu no atuál Prezidente Konsellu Kombatente Libertasaun Nasionál Baucau, Fernando 'Beredu'u' Gusmão. Imajen TATOLI/Nelson de Sousa

BAUCAU, 30 agostu 2021 (TATOLI)–Veteranu no atuál Prezidente Konsellu Kombatente Libertasaun Nasionál Baucau, Fernando ‘Beredu’u’ Gusmão, husu líder nasionál sira tenke unidade atu rezolve problema nasaun no povu.

“Xanana, Taur Matan Ruak, Lú Olo, Marí Alkatiri no Lere Anan Timur, tenke hamutuk mak iha hanoin di’ak atu atinje mehi liberta povu hosi kiak no mukit,” Prezidente Konsellu Kombatente hateten iha ninia rezidénsia, Villa nova, segunda ne’e.

Tuir Beredu’u, tinan 22 ona Timor-Leste ukun-an maibé povu balun de’it mak sente iha mudansa moris, enkuantu seluk seidauk senti ukun-an.

“Situasaun ne’e mosu tanba líder sira sempre fahe malu, partidu diferente hamosu iha hanoin oin-oin hodi kontra malu. Sira líder nasaun maibé la hamutuk ne’e oinsá, balun dehan tanba polítika maibé uluk hamutuk halo funu no manan, loloos hamutuk ukun la’ós fahe malu,” Beredu’u akresenta.

Tanba ne’e, veteranu ne’e konsidera iha autór balun tenta soran líder sira hodi fahe malu no hakarak aproveita situasaun hodi kaer ukun.

“Sira katuas hotu ona, tanba ne’e matenek sira hakarak líder sira fahe malu tanba hakarak ukun,” nia hatutan.

Beredu’u konta tuir, iha tempu konsulta populár iha tinan 22 liubá, veteranu sira ajuda mobiliza povu no organiza soldadu hotu hodi partisipa iha votasaun.

“UNAMET mai entaun mobiliza liután ema ba vota, tanba liuhosi dalan ne’e mak bele manan funu, se funu de’it bele manan maibé bele mate hotu, povu barak mak hamrik ona, bainhira barak ita sempre manan funu, ami garante katak manan ona funu,” nia tenik.

Nune’e, veteranu no povu sira sente haksolok ho rezultadu votasaun referedu ne’ebé ikus mai Timor-Leste bele ukun rasik-an.

Prezidente Konsellu Kombatente dehan, tuir loloos ohin iha selebrasaun Konseulta Populár hanesan baibain, maibé tanba situasaun pandemia no serka sanitária, halo ema hotu hakmatek iha uma.

Loron 30 agostu 1999 sai loron istóriku ba Timor-Leste, tanba povu hamutuk 451.792 mak vota ba determinasaun ukun rasik-an, ho rezultadu 344.580 (78,50%) mak hili ukun rasik-an no 94.388 (21,50%) mak hili otonomia.

Jornalista : Natalino Belo

Editora      : Julia Chatarina

iklan
iklan

Leave a Reply

iklan
error: Content is protected !!