DILI, 06 setembru 2021 (TATOLI)—Ministériu Defeza (MD), husu tan adisionál millaun $60, hosi Orsamentu Jerál Estadu (OJE) 2022, durante aprezentasaun ba Komité Revizaun no Orsamentu Polítika (KROP).
Ministru Defeza, Filomeno da Paixão de Jesus, hateten ministériu ne’e hetan tetu inisiál millaun $40, tanba alokasaun la sufisiente, nune’e husu tán adisionál.
Notísia relevante:MD husu adisionál millaun 100 USD iha KROP
“Iha aprezentasaun KROP ita husu tán adisionál ba saláriu no vensimentu, bens serbisu no kapitál menór, ne’ebé iha tetu inisiál iha millaun $40 ho tán adisionál millaun $60,” Ministru ne’e hateten ba jornalista-sira hafoin sorumutu iha edifísiu Ministériu Finansa, Aitarak-laran, segunda ne’e.
Verba alokasaun ba saláriu vensimentu mak sei halo tán rekrutamentu foun ba membru FALINTIL Forsa Defeza Timor-Leste (F-FDTL), bens serbisu ne’ebé prevee sei sosa tán ekipamentu hanesan komunikasaun ho sira seluk tan ba F-FDTL.
Kona-bá kapitál menór prevee boot ba área konstrusaun Portu Navál Hera ho fazeadamente, baze ba komponente navál, terrestre ho infraestrutura postu iha fronteira.
Jornalista: Nelson de Sousa
Editór: Cipriano Colo
