Portugál oferese vasina AstraZeneca doze 130.000 ba TL
DILI, 07 setembru 2021 (TATOLI)—Governu Portugál oferese vasina kontra COVID-19 ho tipu AstraZeneca, hamutuk doze 130.000 ba Timor-Leste (TL), ne’ebé transporta ona to’o aeroportu intenasionál Prezidente Nicolau Lobato,Comoro, iha tersa ne’e tuku 07:00 otl.
“Ohin to’o iha aeroportu Comoro ida dadeer no ita simu vasina ne’e depois transporta kedan ba armazén Serbisu Autónomu Medikamentu no Ekipamentus Saúde (SAMES),” Diretór ezekutivu SAMES, Santana Martins, informa ba jornalista-sira iha Kampung Alor.
Notísia relevante:Sidadaun vasinadu doze dahuluk iha TL 380.300
SAMES sei halo distribuisaun bazeia ba pedidu-sira ne’ebé mai hosi fasilidade saúde-sira no mós mai hosi sekretariadu COVAX Facility.
Kona-bá vasina ne’ebé Governu TL simu uluk hosi Austrália sei expire iha 31 outubru, hosi Governu Japaun sei expire iha 09 novembru no Governu Potugál nian sei expire iha 30 novembru 2021.
“Agora ita haree fali ba sistema hosi SAMES ne’ebé sei fó prioridade liu ba ida ne’ebé mak expire iha fulan outubru, depois kontinua ba ida ne’ebé expire ikus liu, tanba totál vasina anteriór ne’ebé daudaun ne’e iha armazén SAMES hamutuk doze 34.500,” Nia esplika.
Kona-bá estoke vasina Sinovac doze daruak SAMES sei iha doze 16.552 no oras ne’e kontinua hela ho planu atu halo distribuisaun tanba vasina ne’e sei expire iha 04 abril 2023.
Jornalista: Felicidade Ximenes
Editór: Cipriano Colo
