DILI, 07 setembru 2021 (TATOLI)—Sekretáriu Estadu Arte no Kultura (SEAK), Teófilo Caldas, hateten iha reuniaun no halo aprezentasaun proposta ba Komité Revizaun no Orsamentu Polítika (KROP) kona-bá tetu Orsamentu Jerál Estadu (OJE) 2022 ne’e, Ministériu Ensinu Supérior Siénsia no Kultura (MESSK) no Sekretária Estadu Arte no Kultura (SEAK) husu tan adisionál millaun $6.
Notísia Relevante: Governu define kompozisaun KROP OJE 2022
“Ami-nia orsamentu iha pakote fiskál 2022 nian ne’e, MESSK no SEAK hamutuk millaun $4-resin, maibé ami halo tan proposta adisionál hodi ami bele hetan millaun $6. Nune’e, ami bele realiza ami-nia atividade sira-ne’ebé mak ami planeia ona,” Teófilo Caldas hateten ba Agência Tatoli, hafoin hamutuk ho ekipa halo aprezentasaun iha KROP ne’ebé hala’o iha auditoriu Ministériu Finansa, Aitarak-Laran, Dili, tersa ne’e.
Proposta adisonál ne’e atu kumprimenta ba programa VIII Governu Konstitusionál no Planu Estratéjiku Dezenvolvimentu Nasionál, tanba Sekretáriu Estadu Arte no Kultura iha nia kompeténsia ida atu halo prezervasaun no konservasaun ba patrimóniu kulturál materiál no immaterial (tanjivél no intanjivél).
“Ezemplu, osan sira-ne’e ita sei fó apoiu ba komunidade sira halo uma lulik, ita fó apoiu ba grupu kulturál no grupu kulturál hanesan grupu kulturál kontemporanea no grupu kulturál komunitária ka grupu kulturál klasiku sira atu promove Timor-Leste nia kultuura no identidade,” nia dehan.
Governu tenke tau matan ba sira tanba sira mak dala barak ajuda Governu hodi halo serimónia rituál, aprezenta dansa no múzika kulturál sira iha atividade loron boot sira hanesan komemorasaun 28 novembru no 20 maiu, no loron nasionál seluk tán.
Ho nune’e, liuhosi aprezentasaun ba Komité Revizaun no Orsamentu Polítika (KROP) ne’e, Sekretária Estadu Arte no Kultura (SEAK) mós husu tán adisionál besik millaun $3, hodi realiza atividade sira-ne’ebé SEAK planea ona.
“Ami husu tan besik millaun $3, ami lakoi foti bo’ot liu. Tanba, razaun mak ita sei haree ba taxa ezekusaun 2021, impaktu hosi pandemia COVID-19 ne’ebé impede ita-nia atividade, no iha tinam oin ne’e realiza Eleisaun Prezensiál. Entaun, iha ne’e mak ami la husu osan boot liu hanesan iha tinan uluk ami husu millaun $4 ka millaun $5, maibé iha tinan ne’e ami husu besik millaun $3 de’it,” nia informa.
Orsamentu besik millaun $3 ne’e, SEAK utiliza uza ba saláriu vensimentu, bens servisu, no transférensia públika ne’ebé sei foka liu konservasaun ba patrimóniu kulturál, liu-liu atu atende konvité sira mai hosi komunidade sira kona-bá inagurasaun uma lulik no fó apoiu ba grupu kulturál sira iha Timor-Leste.
Sekretáriu Estadu Arte no Kultura (SEAK), Teófilo Caldas, hateten Lei Organika Oitavu Governu Konstitusionál nian, Sekretária Estadu Arte no Kultura (SEAK), koajuva iha Ministériu Ensinu Supérior Siénsia no Kultura (MESSK), no agora iha lei orgánika ministériu nian, dekretu-lei númeru 02/2019 ne’e, iha atribuisaun kompeténsia hosi ministériu mai iha Sekretária Estadu Arte no Kultura.
Notísia Relevante: KROP hahú analiza programa orsamentál hosi ministériu no ajénsia autonómu
Jornalista : Nelia Fernandes
Editór : Cancio Ximenes