SAMES fornese oksijéniu garafa 180 ba izolamentu Lahane-Vera Cruz kada loron
DILI, 07 setembru 2021 (TATOLI)—Serbisu Autónomu Medikamentu no Ekipamentus Saúde (SAMES), fornese oksijéniu garafa 120 to’o 180 ba sala izolamentu Lahane no Vera Cruz kada loron, atu responde ba kazu ospitalizasaun COVID-19, ne’ebé aumenta ba beibeik.
“Durante fulan juñu no jullu ita distribui oksijéniu garafa 60 ba sala izolamentu-sira, maibé hahú fulan agostu no setembru kada loron ita transporta 120 to’o 180 garafa tanba kazu ospitalizasaun aumenta ba beibeik,” Diretór Ezekutivu SAMES, Santana Martins, hateten ba jornalista-sira iha kna’ar fatin Kampung Alor, tersa ne’e.
Notísia relevante:SAMES kontrata kompañia rua hodi fornese oksijéniu
Kona-bá produsaun no estoke silindru ne’ebé mak kompañia sira halo, to’o oras-ne’e iha informasaun katak sira la falla no nafatin disponível, maibé difikuldade maka atu rekolla fila-fali silindru mamuk hosi munisípiu maka SAMES halo atraza.
“Ami esforsu makás iha situasaun krítiku liu iha sábadu no domingo foin lalais ne’e, ami tenki lori fila-fali garafa 40 mai hosi ospitál referál Maubisi no rekolla balun mai hosi armazén rejionál Baucau atu bele kobre fila-fali iha Vera Cruz no Lahane,” nia subliña.
Normalmenete kompañia-sira prodús no enxe garafa 40 to’o 60 kada oras, signiifka presiza oras rua to’o tolu atu enxe fila-fali.
Ida-ne’e mak SAMES tenki halo jestaun seluk, hodi hein bele rekolla daudaun no labele haree estratejia ida de’it, maibé tenki uza estratejia oioin atu salva pasiente-sira.
Jornalista: Felicidade Ximenes
Editór: Cipriano Colo
