DILI, 08 setembru 2021 (TATOLI)—Médiku na’in-ualu hosi Austrália to’o ona Timor-Leste (TL), hodi fó apoiu ba serbisu kombate surtu COVID-19.
Embaixadór Austrália iha TL, Peter Roberts kontente tebes tanba médiku Australianu na’in-ualu ho laran kaman bele mai to’o TL, hodi ajuda Governu Timorense atu kombate peste aat ne’e.
Notísia relevante:Governu Austrália oferese tan oksijéniu konsentradu 30 ba MS
Ekipa médiku ne’e mai atu suporta TL kompostu hosi médiku ne’ebé sei halo atendimentu iha emerjénsia na’in-rua, farmasista na’in-ida, enfermeiru na’in-rua, serbisu lojístika na’in-ida, atende ba kontrolu oksijéniu na’in-ida, no epidemolojia na’in-ida.
“Sira na’in-ualu ne’ebé mai ne’e, hanesan solidadriedade hosi Governu Austrália no hanesan mós viziñu atu tulun-malu,” Peter Roberts, hateten ba jornalista-sira iha Aeroportu Internasionál Nicolau Lobato, Kuarta ne’e.
Iha fatin hanesan, reprezentante Gabinete Primeiru Ministru, Danina Coelho, hateten prezensa hosi médiku na’in-ualu hosi Auatrália ne’e, tanba haree semana ikus kazu COVID-19 amuenta makás iha Vera Cruz no Lahane, presiza tebes apoiu di’ak liu tán hodi atende pasiente-sira.
Jornalista: Felicidade Ximenes
Editór: Cipriano Colo
