DILI, 08 setembru 2021 (TATOLI)—Polísia Nasionál Timor-Leste (PNTL), detein ema na’in 117 kompostu hosi feto 23 no mane 94, deskonfia hanesan membru Grupu Arte Marsiál (GAM), ne’ebé kontra regra konfinamentu domisiliáriu jerál, iha Dili.
Ekipa konjunta kompostu hosi Serbisu Informasaun Polísia (SIP), Serbisu Informasaun Militár (SIM), Unidade Espesiál Polísia (UEP), Task Force, Polísia Militár, Serbisu Nasionál Informasaun (SNI) ho Polísia Eskuadra Dom Aleixo, simu informasaun iha iha tersa kalan, katak ema na’in hirak-ne’e hala’o hela atividade Arte Marsiáll iha aldeia Mundu Perdido, suku Manleuana, postu administrativu Dom Aleixo, munisípiu Dili.
Notísia relevante:Semana tolu, PNTL detein ema na’in 153 hakat ilegál
Atividade ne’e, PNTL konsidera kontra regra konfinamentu obrigatóriu no rezolusaun Governu númeru 15/2017.
Nune’e, ekipa Polísia halo serku iha tuku 02:00 madrugada, konsege halo detensaun ba membru hirak-ne’e no iha tuku 06:00 dader, transporta ba iha Komandu PNTL munisípiu Dili.
Ekipa konjuntu hosi Polísia, rekolla mós evidénsia hanesan atributu arte marsiál-nian hanesan farda, inklui motór 92 no karreta tolu.
Tuir observasaun jornalista Agência Tatoli, iha Komandu PNTL munisípiu Dili agora polísia hala’o hela identifikasaun ba sidadaun hirak-ne’e.
Komandu munisípiu Dili mós koordena ona ho parte serbisu saúde, atu halo mós teste swab ba sidadaun hirak ne’e, no bainhira identifikasaun remata, ida-idak sei fila-fali ba uma, maibé prosesu investigasaun kontinua la’o ba Ministériu Públiku (MP), hodi lori ba Tribunál atu loke prosesu tuir-mai.
“Ita halo hela identifikasaun ba-sira, bainhira konklui sei submete ba MP, hodi loke prosesu tuir-mai no bele aprezenta ba Tribunál,” Komandante PNTL, munisípiu Dili, Superintendente Xefe, Henrique da Costa, hateten ba jornalista-sira iha edifísiu Komandu Jerál PNTL, Caicoli, kuarta ne’e.
Projetu rezolusaun Konsellu Ministru ba aplikasaun konfinamentu domisiliáriu jerál ba populasaun iha Dili sita katak, iha área hotu-hotu munisípiu Dili-nian bandu transporte públiku, liuliu táxi, mikrolete no anguna atu halo sirkulasaun.
Alende ne’e, suspende selebrasaun relijioza koletiva no bandu mós atu halo serimónia fúnebre, ne’ebé envolve partisipasaun ema na’in-sanulu liu no sira ne’ebé partisipa serimónia ne’e rasik tenke uza máskara oin, hodi taka inus no ibun inklui mantein distánsia pelumenus metru ida ho ema seluk ne’ebé prezente iha serimónia ne’e.
Estabelesimentu komersiál, industriál, artezanál ka prestasaun servisu taka ba públiku, ho exesaun ba estabelesimentu-sira ne’ebé autoriza iha Rezolusaun Governu, liuliu estabelesimentu ne’ebé fa’an ai-han no sasán nesesidade bázika, eletrisidade, telekomunikasaun, prestasaun kuidadu médiku, farmásia, postu kombustível-nian, no instituisaun finanseira-sira.
Restaurante-sira bele fornese hahán, aplika rejime take away ka entrega iha uma de’it no estabelesimentu seluk taka ba públiku bele dezenvolve ninia atividade liuhosi serbisu entrega ba uma de’it.
Vendedór ambulante ba sasán alimentár no sasán ba nesesidade bázika bele mantein sira-nia atividade, no merkadu Manleuana ho Taibessi bele mantein funsionamentu, hahú hosi tuku 06:00 to’o tuku 18:00 otl.
Jornalista: Nelson de Sousa
Editór: Cipriano Colo
