DILI, 09 setembru 2021 (TATOLI)–Diretór Sentru Nasionál Formasaun Profisionál (CNFP-sigla portugés) Becora, Lourenço da Silva Gusmão informa, iha reuniaun no aprezentasaun proposta ba Komité Revizaun no Orsamentu Polítika (KROP) kona-bá tetu Orsamentu Jerál Estadu (OJE) 2022, CNFP Becora husu tan adisionál $129.073.
“Ohin, ami husu tan adisionál iha Orsamentu Jerál Estadu (OJE) 2022 ne’e hamutuk $129.073 tanba OJE 2022 ba CNFP hamutuk 543.887.00 ne’e la sufisiénte,” Lourenço da Silva Gusmão hateten ba Agência Tatoli, iha nia knaar–fatin, Becora, Dili, kinta ne’e.
CNFP husu adisionál tanba pakote ne’ebé CNFP simu ba tinan oin ne’e seida’uk sufisiénte, tanba iha tinan 2021 ne’e totál osan hamuutuk $729.000.00 maibé ba tinan 2022 ne’e hela de’it ona $543.887.00.
Entaun, nia dehan, ho razaun ida-ne’e mak CNFP presiza tan orsamentu mak $129.073, nune’e CNFP bele responde ba nesesidade sentru ninian iha tinan 2022.
“Orsamentu $129.073 ne’e, ami sei utiliza ba programa haat (4) mak formasaun profisionál liuhosi semináriu, enkargus ba instalasaun, manutensaun ba ekipamentu no edifísiu, no asisténsia téknika,” nia dehan.
Jornalista : Nelia Fernandes
Editór : Cancio Ximenes
