DILI, 17 setembru 2021 (TATOLI)—Governu Japaun ho Fundu Nasaun Unida ba Infánsia (UNICEF), oferese ekipamentu korrente malirin no ekipamentu Information and Communications Technology (ICT) ba Ministériu Saúde (MS), atu estabelese iha armazén rejionál haat hanesan Baucau, Ainaro, Bobonaro no RAEOA, hodi asegura vasina COVID-19 no vasina rutina-sira seluk.
Projetu ida-ne’e kompostu hosi ekipamentu oi-oin, inklui sala malirin haat, estabilizadór tensaun lima, etiquetas jeladeira, hodi monitoriza temperatura 500 no labtop 20, inklui asisténsia téknika ba instalasaun no treinamentu ba funsionáriu.
Notísia relevante:UNICEF ho UE apoiu ekipamentu eletróniku ba MEJD
Ekipamentu hirak-ne’e sei uza iha Serbisu Autónomu Medikamentu no Ekipamentu Saúde (SAMES) no armazén rejionál ne’ebé sei ajuda lori vasina hirak-ne’e to’o ba povu nia liman ho seguru.
Embaixadór Japaun iha Timor-Leste, Masami Kinefuchi, hateten lia hirak ne’e iha diskursu asina termu entrega iha armazén SAMES, Kampung Alor, sesta ne’e.
“Projetu segundu ne’ebé husu ba UNICEF atu implementa mak hanesan espansaun ba kapasidade armazenamentu korente malirin vasina ho totál orsamentu millaun $1.2,” Masami Kinefuchi, hateten.
Japaun oferese ona asisténsia substansiál oi-oin ba prioridade tolu ho totál orsamentu millaun $16-resin liu hosi JICA, UNICEF, ADB no UNDP no mós ONG sira.
Iha fatin hanesan Reprezentante UNICEF iha TL, Bilal Durrani, hateten kapasidade korrente malirin (cold chain) iha armazén rejionál-sira importante atu fortalese sistema saúde no konstrusaun sistema saúde iha nível sub-nasionál.
Hafoin ezersísiu mapeamentu ida, lidera hosi Ministériu Saúde, identifika ona rekomendasaun-sira hodi fortalese sistema cold chain iha TL, UNICEF ho jenerozu apoiu hosi Governu Japaun, aumenta ona kapasiade cold chain iha armazén rejionál-sira liu-liu iha RAEOA (Oecusse), munisípiu Ainaro, Baucau, no Bobonaro.
Vasina Pfizer sei to’o TL iha outubru
Tuir planu, COVAX Facility sei transporta vasina Pfizer mai Timor-Leste (TL), iha inísiu fulan outubru, tinan ne’e.
“Korrente malirin sei to’o iha fim fulan ne’e. Bainhira zelera malirin instaladu, maka vasina Pfizer to’o mai hodi bele rai ho diadi’ak atu vasina labarik idade 12 to’o 17,” Reprezentante UNICEF iha TL, Bilal Durrani, hateten.
Vasina Pfizer presiza fatin ne’ebé mak malirin ho temperatura menus 80 grau sélsiu, nune’e labele rai vasina ne’e ba temperatura ne’ebé kiik.
Jornalista: Felicidade Ximenes
Editór: Cipriano Colo
