DILI, 22 setembru 2021 (TATOLI)–Estadu Unida Amérika (EUA) fó apresiasaun ba Timor-Leste nia progresu demokrasia no promosaun direitu umanu, tanba la’o ho di’ak tebes dezde independénsia.
Enkarregadu Negósiu hosi Embaixada EUA iha Timor-Leste, Tom Daley, hateten Estadu Unida Amérika kompromitidu hametin amizade nu’udar parséria rohan laek ho Timor-Leste.
“Estadu Unida Amérika louva Timor-Leste nia progresu signifikante ne’ebé halo ona dezde independénsia, hodi promove no dezenvolve instituisaun demokrátiku sira liuhosi demokrasia no promove direitu umanu,” Tom Daley informa ba Agência TATOLI, hafoin ko’alia asuntu ne’e hafoin hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, iha Parlamentu Nasionál, kuarta ne’e.
Nia dehan, Estadu Unida Amérika kompartilla valór sira hanesan demokrásia no promosaun direitu umanu, tanba ida-ne’e mak sei permite parséria ne’e kontinua buras nune’e dezenvolve di’ak liután ba future.
Jornalista : Evaristo Soares Martins
Editór : Cancio Ximenes
