DILI, 22 setembru 2021 (TATOLI)–Enkarregadu Negósiu hosi Embaixada Estadu Unida Amérika (EUA), Tom Daley, hateten prosesu atu hili embaixadór foun ba Timor-Leste sei lori tempu naruk.
Notísia Relevante: Embaixadór EUA Blackstone sei rezigna-an hosi kargu
“Prosesu atu hili embaixadór foun hosi Estadu Unida Amérika ba Timor-Leste sei lori tempu kleur, tanba Departamentu Estadu ka Ministériu Negósiu Estranjeiru EUA nian sei kompilla lista ida hafoin haruka ba Governu iha Casa Branca,” Tom Daley informa ba Agência TATOLI, iha uma fukun, kuarta ne’e.
Casa Branca sei avalia fali kandidatu sira-ne’e no hili ida hodi aprezenta ba parlamentu EUA nian, no hosi ne’e sei aproxima fila-fali ho Governu Timor-Leste liuhosi mekanizmu ida naran agreement katak sei husu ba Governu Timor-Leste aseita ho kandidatu ida-ne’e ka lae.
Hafoin simu konfirmasaun liuhosi agreement ida-ne’e mak Casa Branca sei foti desizaun definitivu ba kandidatu ne’e.
“Ami-nia komisaun relasaun asuntu internasionál iha ami-nia senadu sei halo fali enkontru ida hodi halo avaliasaun tán ba kandidatu ne’e. Komisaun ne’e mak sei halo votasaun, karik sira konkorda kandidatu ne’ebé nomeadu ne’e ka lae,” nia esplika.
Bainhira komunikasaun asuntu internasionál iha senadu ne’e simu ona kandidatu ne’e, hotu-hotu vota a-favór ona mak sei haruka fali ba senadu hodi halo votasaun final, hafoin senadu konfirma ona kandidatu definitivu ne’e mak foin pose ba embaixadór foun ne’e.
“Ne’e sei lori tempu kleur no ita hotu laiha serteza to’o bainhira,” Tom Daley hateten.
Entretantu Embaixadór EUA ba Timor-Leste, Charles Kevin Blackstone rezigna-aan iha loron 02 agostu 2021 liubá ho razaun pesoál urjente, no hafoin Charles Kevin Blackstone rezigna seidauk iha embaixadór foun hosi EUA ba Timor-Leste.
Jornalista : Evaristo Soares Martins
Editór : Cancio Ximenes
