DILI, 22 setembru 2021 (TATOLI)—Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Lere Anan Timur, hateten Xefe Estadu Francisco Guterres Lú Olo konkorda koloka F-FDTL iha fronteira.
Notísia Relevante: MD-PNTL deskuti kolokasaun F-FDTL iha fronteira
“Prezidente Repúblika Francisco Guterres Lu Olo konkorda koloka forsa armada iha fronteira tanba bazea ba lei defeza nasionál ne’e maihosi konstituisaun ne’ebé seidauk muda,” Tenente Jenerál Lere Anan Timur ba jornalista sira hafoin ramata enkontru semanál ho Prezidente Repúblika Francisco Guterres Lú Olo, iha Palásiu Prezidénsia Repúblika, kuarta ne’e.
Maske iha diverjénsia ka opiniaun la hanesan kona-bá kolokasaun F-FDTL iha fronteira, maibé hakarak ka lakohi F-FDTL tenke ba fronteira tanba ida-ne’e desizaun hosi Governu.
Tanba, nia dehan, kualkér lei liu-liu lei defeza nasionál, konseitu estratéjika defeza nasionál ninia mai hosi konsitituisaun, entaun konstituisaun dehan defeza externa iha forsa armada nia liman, la dúvida F-FDTL tenke ba ne’ebá no ida-ne’e la’os atu kria konflitu.
“Ha’u fiar katak PNTL tantu F-FDTL atu ba jere fronteira, sira ba halo seguransa iha fronteira no fronteira, tanba ne’e Komisaun Integradu ida mak sei jere fronteira,” nia dehan.
Tanba, nia hateten, se agora Indonézia tau Tentara Nasional Indonesia (TNI) iha fronteira nusa mak Timor labele tau F-FDTL iha fronteira, entaun koloka F-FDTL iha fronteira ne’e entre PNTL no F-FDTL atu kompleta malu.
“Governu deside ona koloka forsa iha ne’ebá, agora kestaun Governu tenke kria kondisaun, infraestrutura ho transporte rua ne’e de’it forsa iha ne’ebá halo operasaun ona. Komandante sira sei maka’as liután iha dixiplina, labele lutu sai fali kondisaun atu ilegál sira tama-sai ho livre, ida-ne’e mak labele. Iha forsa armada, ha’u hateten sé mak halo ida-ne’e, prosesa no hasai tiha tanba la serve no laiha lealidade,” nia dehan.
Jornalista : Osória Marques
Editór : Cancio Ximenes
