DILI, 23 setembru 2021 (TATOLI)–Parlamentu Nasionál liuhosi Komisaun F ne’ebé trata asuntu Saúde, bolu Ministra Saúde (MS), Odete Maria Freitas Belo, atu klarifika kazu ema mate iha Postu Administrativu Quelicai, Munisípiu Baucau.
“Ami mai responde informasaun sira-ne’ebé deputadu sira rona kona-bá atu lockdowan fila-fali, depois sona fali iha kidan. Ne’e la loos. Kazu mate iha Quelicai ne’e halo hela investigasaun, kuandu rezultadu iha ona, ita sei fó-sai,” Ministra Saúde, Odete Maria Freitas Belo, informa ba jornalista sira, iha uma fukun, kinta ne’e.
Entretantu, Vise-Prezidente Komisaun F ne’ebé trata asuntu Saúde, Deputadu Felix da Costa “Anin Buras”, hateten parlamentu bolu ekipa Ministériu Saúde hodi halo esplikasaun kona-bá kazu mate iha Quelicai no asuntu sira seluk.
Deputadu Anin Buras hateten, la’ós iha Quelicai mesak mak ema mate maibé iha territóriu tomak mós ema mate maibé ida viral liu mak ema mate iha Postu Administrativu Quelicai.
“Ohin, ami konfirma hotu kazu sira-ne’e maibé hosi parte Ministériu Saúde dehan halo hela verifikasaun, ne’ebé hahú hosi loron 01 agostu to’o 19 agostu ne’e hetan duni mate ne’e ema na’in 50. Maibé hosi ne’e mai, Ministra Saúde seidauk bele fó komentáriu tanba ekipa sei halo verifikasaun dadus kona-bá mate sira-ne’e,” Anin Buras hateten.
Tuir nia, Ministra Saúde dehan halo hela verifikasaun hodi justifika katak mate tanba vasina ka la vasina, ho razaun katak katuas sira-ne’ebé mate barak ne’e tanba la sai hosi uma no dalaruma ninia transmisaun ne’e bele mai hosi ema sira-ne’ebé la’o ba mai ne’e balun pozitivu COVID-19, entaun bele da’et ba katuas sira iha uma no bele rezulta mate.
“Ministra Saúde mós seidauk informa ho klareza ba deputadu sira iha Komisaun F, tanba ekipa ida halo hela verifikasaun ba dadus,” nia dehan.
Jornalista : Evaristo Soares Martins
Editór : Cancio Ximenes
