DILI, 23 setembru 2021 (TATOLI)—Serbisu Autónomu Medikamentu no Ekipamentu Saúde (SAMES) sosa ona silindru oksijéniu hamutuk 1.500, hodi monta iha izolamentu sira ne’ebé agora daudaun kazu aumenta makás.
Silindru oksijéniu hirak ne’e, kompleta kedan ho asesores, kompostu hosi silindru boot ho kapasidade litru 40 hamutuk garafa 1.000 no metade kiik litru 20 hamutuk garafa 500.
Notísia relevante:Austrália oferese silindru oksijéniu 84 ba SAMES
“Silindru sira-ne’e ita sei uza atu responde ba nesesidade no fornesimentu oksijéniu iha sala izolamentu ne’ebé kazu aumenta makás,” Diretór Aprovizionamentu SAMES, Francisco Borges, hateten ba jornalista iha edifísiu SAMES Kampung Alor, kinta ne’e.
Montante orsamentu ba kompra silindru oksijéniu ne’e hamutuk $60.000, importa hosi nasaun Xina no parte Ministériu Saúde esforsu hela atu bele hetan tan apoiu hosi parseiru sira, tuir tarjetu sei to’o garafa 5.000.
Tuir planu, parte SAMES sei halo distribuisaun ba silindru oksijéniu hirak ne’e ba izolamentu sira iha tempu badak.
Jornalista: Felicidade Ximenes
Editór: Cipriano Colo
