DILI, 23 setembru 2021 (TATOLI)—Sekretaria Estadu Formasaun Profisionál no Empregu (SEFOPE) daudaun ne’e prepara hela pesoál enumeradór atu halo peskiza ba dadus empregu no dezempregu iha Timor-Leste.
“Ita-nia taxa númeru dezempregu hosi tinan 2013 ne’ebé maka parte Diresaun Nasionál Estatístika hamutuk ho SEFOPE lansa iha Ministeriu finansa iha tinan kotuk, hatudu katak 11% populasaun mak dezempregu ka laiha serbisu, maibé agora ita la hatene, tanba ne’e tinan ida ne’e SEFOPE hamutuk ho Ministériu Finansa hahú fó formasaun ba enumeradór sira atu akumula dadus forsa traballu, liuliu taxa empregu no dezempregu iha Timor-Leste,” Diretór Nasionál Relasaun Traballlu hosi SEFOPE, Ângelo dos Santos Valoso, iha edifísiu Caicoli, kinta ne’e.
Enumeradór sei tuir formasaun durante semana rua, hafoin tun terrenu halo peskiza hodi akumula dadus.
Bazeia hosi dadus estatístika, forsa traballu iha tinan 2015 hatudu katak totál populasaun ne’ebé dezempregada iha Timor-Leste hamutuk 19.333, ho ninia taxa dezempregu tuir sensu 2015 hamutuk 4,8%.
Joralista : Natalino Costa
Editora : Julia Chatarina
