BOBONARO, 26 setembru 2021 (TATOLI)–Jogu futeból femenina époka 2021, iha kampu futeból Maliana, munisípiu Bobonaro, loron domingu (26/09) ne’e, ekipa Diabun halakon Gedung Putih FC ho rezultadu 5:0.
Iha inísiu jogu, ekipa rua lansa kontra taka ba malu, ho ida-idak nia tékniku, ne’ebé Diabun joga ho modelu ofensivu no Gedung Putih joga kalma, maibé iha ambisaun atu prodúz golu.
Nune’e, jogu la’o minutu 20 no oportunidade monu uluk ba Diabun FC, liuhosi Jogadora Belinha Nelia Lay (9), ne’ebé fura uluk rede adversáriu hodi muda rezultadu ba 1:0.
Ho rezultadu ne’e, halo ekipa Diabun hasa’e tan ritmu jogu, hodi halo ataka maka’as iha liña oin, no bainhira jogu la’o de’it minutu lima, Jogadora Sauginha dos Santos (6), fura tan golu ida iha minutu 25 hodi muda rezultadu ba 2:0, ne’ebé rezultadu ne’e mantein to’o termina primeira parte, maski ekipa rua lansa kontra taka malu maka’as, maibé la rezulta golu ruma.
Hakur ba segunda parte, ekipa Gedung Putih halo mudansa jogu modelu ofensivu ho tensaun atu prodúz golu, maibé defeza Diabun FC konsege hamate sira-nia jogu ho téknika individuál.
Jogu la’o de’it iha minutu balun, oportunidade datoluk monu tan ba Diabun liuhosi Jogadora Sauginha dos Santos (6) fura tan nia golu daruak iha minutu 66 hodi muda rezultadu ba 3:0.
Liu de’it minutu rua jogadora hanesan fura tan golu ida iha minutu 68, hodi muda rezultadu ba 4:0, halo jogadora ne’e konsege marka Headtrick.
Ho rezultadu ne’e, halo situasaun jogu manas liu tan no adeptu sira hosi Diabun haklalak hodi fó motivasaun ba sira-nia jogadora sira, ikus mai oportunidade monu tan ba Diabun liuhosi Jogadora Maria Auxiliadora (5), ne’ebé susesu fura tan golu ida iha minutu 70 hodi dudu rezultadu ba 5:0.
Maski nune’e, golu ne’e la hamate ekipa Gedung Putih nia vontade, tanba sira mós nafain iha ambisaun atu prodúz golu, maibé la konsege to’o sira-nia alvu tamba situasaun udan, halo sira forsa menus no ikus mai defeza Diabun konsege hamate sira-nia jogu.
Jogu la’o tan minutu balun no ekipa rua nafatin halo kontra ataka ba malu, maibé la rezulta golu ruma to’o árbritu deside hakotu jogu segunda parte ho vitória ba ekipa ba Diabun.
Treinadór Diabun, Amarico Sousa Pereira, sente kontente ho rezultadu vitória ne’ebé nia ekipa hatudu, maski foin primeira vez joga iha Kampu boot.
“Hanesan treinadór, ha’u orgulu ho rezultadu ne’e, maski durante ne’e ami-nia preparasaun ladún másimu tamba labarik sira sempre hasoru problema hanesan atividade barak, entaun ladún mai treinu, no kampu mós kiik, maibé ida-ne’e la’ós obstákulu atu hamate treinadór nia espíritu hodi motiva jogadora sira badinas treinu,” Treinadór Diabun dehan ba Agência TATOLI, iha Kampu Futeból Maliana, hafoin ramata jogu.
Durante jogu, Treinadór ne’e nota katak jogadora sira barak mak seidauk kompreende regra jogu, tamba ne’e, ba oin sei esforsu hodi motiva liu tan jogadora sira hodi hatudu disiplina, marka out side, nune’e bele kompete iha jogu tuir mai no bele mantein rezultadu vitória.
Iha Fatin hanesan, Treinadór Gedung Putih FC, João Brito, rekoñese nia ekipa derota tamba preparasaun ladún masimu.
“Ami foin mak treinu semana rua, hafoin rona informasaun katak asosiasaun atu realiza eventu ne’e, maibé sente kontente maski lakon, tamba eventu ida sempre iha manan no lakon, ne’ebé ba oin ami sei haka’as liu tan atu manán klube seluk,” nia otimizta.
Jogu ne’e lidera hosi Árbritu lokál, João Gouveia, Asistente primeiru, Domingos Asis, Asistente segundu, Olívio Vicente, Árbritu Mateus Marques, ne’ebé Árbritu hirak ne’e tuir ona formasaun hosi Departamentu Árbritu Nasionál Federasaun Futeból Timor-Leste (FFTL), ho sertifikadu nível (D).
Tuir orário hosi komisaun organizadora eventuál, aban tuku 16:00 lorokraik, sei iha jogu entre klube Rokon FC kontra Cavalo Fronteira.
Jornalista : Sérgio da Cruz
Editora : Julia Chatarina
