DILI, 28 setembru 2021 (TATOLI)— Ahi-han Eduardo Lobato Alves (24), ne’ebé ho moras-mentál iha aldeia Leopa, suku Dato, postu administrativu Liquiça Vila, munisípiu Liquiça ho kondisaun iha hela taxi laran, tersa 28 setembru tuku 09:30 otl.
Tuir relatóriu Polísia Nasionál Timor-Leste (PNTL) Komandu Munisípiu Liquiça, katak vítima ba tuur iha taxi laran ne’ebé para hela iha viziñu sira-nia uma oin, ho fuma sigarru maka mosu akontesimentu ne’e.
Notísia relevante:Loron rua, ema na’in-rua mate tanba asidente tráfegu
“Vítima ne’e ba iha señor ida-nia uma no to’o ne’ebá atu ba tuur iha taxi laran, vítima loke odamatan hosi karreta kotuk hodi ba tuur iha laran akompaña ho fuma hela sigarru, nia so’e fali sigarru rohan taxi karreta laran ikus ahí-han,” Komandante PNTL, munisípiu Liquiça, Superintendente, Umbelina dos Santos Soares, hateten ba jornalista via WhatsApp, tersa ne’e.
Vítima atu halai sai hosi karreta laran ladi’ak no viziñu maka haree fali ahí-han karreta, ikus-mai sira lori besi selok odamatan mak salva.
Família komunika kedan ambulánsia hodi ba Sentru Saúde Liquiça, maibé ho kondisaun grave, nune’e transporta kedan mai Ospitál Nasionál Guido Valedares (HNGV, silga portugés), hodi halo tratamentu intensivu.
Parte Polísia tun ona iha terrenu, hodi rekolla informasaun hodi apura loloos motivu hosi akontesimentu ne’e.
Jornalista: Nelson de Sousa
Editór: Cipriano Colo
