DILI, 28 setembru 2021 (TATOLI)—Kada semana, Ospitál Nasionál Guido Valadares (HNGV sígla portugés), rejista pasiente ho moras kankru susun, na’in-lima.
“Númeru kankru susun iha HNGV sempre sa’e makás. Ita bele kalkula, fulan ida kazu bele sa’e entaun ida ne’e mak ita enfrenta daudaun,” Diretór Ezekutivu HNGV hanesan mós Prezidente Komité Nasionál Kankru Susun TL, Alito Soares, hateten ba jornalista-sira hafoin partisipa iha sosializasaun moras kankru susun serviks no nutrisaun iha Caicoli, tersa ne’e.
Notísia relevante:HNGV enfrenta difikuldade kombate kankru susun
Alito Soares preokupa ho númeru ne’e, tanba dala barak pasiente sira sempre ba HNGV ho stadium avansadu, entaun konkluzaun provizóriu katak, dalaruma komunidade seidauk iha koñesimentu ne’ebé kle’an kona-bá prevensaun moras ne’e.
Ho ida-ne’e maka, Komite Kankru Susun Timor-Leste hamtutuk ho Espoza Prezidente Repúblika, trasa ona planu hodi halo sensibilizasaun liu hosi semináriu iha fatin-fatin, fahe informasaun kona-bá sinál síntoma no oinsa bele asesu lalais ba fasilidade saúde.
Iha fatin hanesan, Espoza Prezidente Repúblika, Cidália Nobre Guterres, hateten presija kontinua halo sensibilizasaun másimu, tanba inan-feton barak mak seidauk iha koñesimentu.
Tanba ne’e, nia husu ba membru Rede Feto atu serbisu makás liu tan iha área rurál hodi bele hatutan informasaun ba komunidade, nune’e bele iha koñesimentu diak hodi hakbesik ba fasilidade saúde.
Jornalista: Felicidade Ximenes
Editór: Cipriano Colo
