DILI, 28 setembru 2021 (TATOLI)—Primeiru-Ministru (PM), Taur Matan Ruak, otimista bele konkretiza objetivu vasina 80% ba populasaun eleijível to’o tinan ne’e ramata, nune’e Timor-Leste bele tama ba normalidade foun.
“Ha’u fiar katak ho ritmu vasinasaun ne’ebé rejistadu, númeru hosi ema inokulada sira ho vasina doze daruak ne’ebé kontinua aumenta, mantein viavel no konretizável objetivu vasina 80% hosi populasaun elejível sira iha Timor-Leste to’o tinan ne’e ramata,” Xefe Governu hateten iha debate pedidu renovasaun Estadu Emerjénsia ba da-XVIII, iha sala plenária, Parlamentu Nasionál, tersa ne’e.
To’o loron 21 setembru, populasaun 77% mak simu ona vasina doze dahuluk iha munisípiu Dili no 57,6% hosi populasaun nasionál.
“Maski hasoru difikuldade iha terrenu, maibé programa nasionál vasinasaun la’o nafatin ho ritmu di’ak. Iha loron 07 setembru kotuk, ita simu dozes vasinasaun kontra COVID-19 ho totál 1.112.380, ne’ebé fornese hosi sistema COVAX no hosi país amigu sira hanesan Austrália, Xina, Japaun, Nova Zelándia no Portugál,” Xefe Governu informa.
Notísia relevante: TL sei simu doasaun vasina Pfizer doze 100.620
Aleinde ne’e, vasina Pfizer doze dahuluk ne’ebé atu vasina ba labarik no joven sira ho idade entre tinan 12 to’o tinan 17 atu to’o ona Dili.
“Ritmu ezekusaun planu vasina ne’ebé di’ak permite atu hapara limitasaun no restrisaun graduál sira hodi impede propagasaun vírus iha territóriu nasionál no normalizasaun progresiva ba realizasaun atividade sosiál no ekonómika sira iha ita-nia país. Daudaun ne’e Governu promove atu reabertura fazeada ba ensinu prezensiál iha munisípiu Dili, maski nune’e ba mós kontinua tau-matan ba evolusaun situasaun no prontu atu atua bainhira iha nesesidade.
Governu reafirma no renova kompromisu atu kontinua haloos medida atu kombate COVID-19 nian iha situasaun pandemia ne’e, tuir dadus sira ne’ebé rekolla ho rekomendasaun sira ne’ebé emite ona hosi entidade kompetente sira kona-ba saúde públika.
“Ita dezeja katak filafali ba normalidade bele hala’o ho seguru no konsistente, fiar katak susesu ba ezekusaun planu vasinasaun sei reprezenta oportunidade foun hodi hasa’e limitasaun no restrisaun sira ne’ebé sei iha no kontinua filafali dalan kreximentu ekonómiku ne’ebé ita liu ona iha tinan 2019 tanba kauza huoi pandemia,” PM subliña.
Iha sorin seluk, kazu akumuladu infesaun COVID-19 hahú 20 marsu 2020 to’o agora hamutuk 19.000 no kazu rekuperadu 18.000 resin no óbitu rejistadu desde inísiu hamutuk 113.
“Iha esforsu mobilizasaun tomak kontra COVID, ha’u apela ba ema sira ne’ebé mak seidauk vasina, atu nune’e sira bele simu vasina, buka no hetan vasina hodi kontribui, ne’e la’ós protesaun ba ninia-an de’it hodi kontra moras, ne’ebé maka bele foti ona ema 100 resin iha ita-nia rain, maibé hodi garante ba protesaun familiár sira, amigu, kolega sira, no ita-nia komunidade rai-laran,” nia apela.
Jornalista : Antónia Gusmão
Editora : Julia Chatarina
