DILI, 29 setembru 2021 (TATOLI)—Governu liuhosi Ministériu Turizmu, Komérsiu no Indústria (MTKI) asina ona akordu ho Banku Nasionál Komérsiu Timor-Leste (BNCTL, sigla portugés) atu transfere tan kapitál ba programa fasilidade garantia kréditu sosiál (soft-loan) ba empreza ho funan 3%.
“Akordu ho BNCTL hanesan tranferénsia kapitál hosi konta bankária ministériu ba BNCTL liuhosi Orsamentu Jerál Estadu (OJE) 2021 hamutuk $900.000, atu aumenta fundu ne’ebé tinan kotuk MTKI ho Programa Nasaun Unida ba Dezenvolvimentu (PNUD) transfere ona ho montante $480.000,” Ministru Turizmu Komérsiu no Indústria, José Lucas do Carmos da Silva, hateten, hafoin selebra akordu iha edifísiu MTKI, Bebora, kuarta ne’e.
Ho transferénsia ne’e, Governu transfere ona kapitál ba BNCTL hamutuk millaun $1,3-resin atu implementa programa fasilidade garantia kréditu.
Notísia relevante: MTKI-BNCTL asina akordu ho benefisiáriu garantia kréditu sosiál
Programa ne’e sei foku liu ba empreza sira ne’ebé hala’o negósiu iha área produtivu hanesan agrikultura, turizmu, pekuária, peska, indústria no komérsiu, hodi kria mós kampu traballu iha Timor-Leste.
“Ita-nia empreza kuaze na’in-11 sai ona benefisiáriu no kontinua simu nafatin proposta sira ne’ebé daudaun hamutuk ona 40-resin mak iha ona prosesu avaliasaun, tuir rekezitu ne’ebé banku aplika,” Ministru hatutan.
Aplikante sira ba kréditu suave tenke iha planu negósiu di’ak iha fasilidade no iha orientasaun ne’ebé sustentável ho kapitál no presiza tuir rekezitu, ne’ebé iha lisensa hosi Servisu Rejistrasaun no Verifikasaun Emprezariál (SERVE).
Governu liuhosi MTKI hamosu programa kréditu suave hodi fó biban ba mikro, pekena no média empreza, hodi bele asesu finaseiru liuhosi juru mínimu 3% kada tinan no períodu durante fulan-tolu to’o neen.
“Ita hakarak labele hatoman empreza sira uza orsamentu iha tranferénsia de’it, maibé tenke iha akontabilidade ne’ebé kualidade,” nia afirma.
Iha biban hanesan, Diretór Ezekutivu BNCTL, Brígidio de Sousa, agradese no kongratula ba Governu liuhosi MTKI, ne’ebé kontinua aumenta kapitál atubele fasilita implementa programa ho karaterístika sosiál ba empreza sira.
BNCTL simu proposta empreza na’in-11 no sai ona benefisiáriu ba kréditu suave ne’e ho montante $116.000, maibé empreza na’in-tolu mak seidauk asesu kréditu tanba rekezitu balun ho montante $48.000 no sei avalia hela proposta hosi empreza na’in-lima ho montante $99.000.
“Ita haree katak kréditu suave ne’e iha progresu di’ak tanba iha proposta hosi empreza na’in-19, ne’ebé ita konsege aprova ona balun no balun hein kompleta dokumentu atubele aprova hodi aseseu kréditu suave inklui balun iha prosesu avaliasaun nia-laran,” Diretór Ezekutivu dehan.
Iha sorin seluk, nia mós nota katak programa ne’e di’ak tebes no espera iha tinan ikus 2021 bele aprova proposta hosi empreza kiik no media na’in-80 .
Jornalista : Florêncio Miranda Ximenes
Editora : Julia Chatarina
