DILI, 30 setembru 2021 (TATOLI)—Sala Situasaun, Sentru Integradu Jestaun Krize (SIJK), rejista kazu mate rua, pozitivu 43, rekoperadu 56 no kazu ativu 765.
Totál óbitu ne’ebé relata ohin, primeiru feto ho idade 40, hela iha Liquiça, seidauk vasina, iha 29 setembru 2021, diagnóstikada sindroma insufisiénsia respiratória aguda (SIRA) tanba COVID-19.
Notísia relevante:COVID-19, mate ida no kazu ativu 778
Iha loron ne’e kedan hala’o tratamentu iha Lahane. Ohin loraik tuku 14:45 matebian iis-kotu. Família kolabora ho ekipa saúde hodi hala’o funerál tuir protokolu ne’ebé adopta iha Timor-Leste.
Segundu, mane ida ho idade 63, hela iha RAEOA, seidauk vasina, iha 28 setembru 2021, diagnóstikadu sindroma insufisiénsia respiratória aguda (SIRA) tanba COVID-19.
Iha loron ne’e kedan hala’o tratamentu iha fatin izolamentu iha RAEOA. Matebian iha mós problema tuberkuloze.
“Ohin dader tuku 02:30 matebian iis-kotu, iha RAEOA. Familia kolabora ho ekipa saúde, hodi hala’o funerál tuir protokolu ne’ebé adopta iha Timor-Leste,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liuhosi komunikadu, kinta ne’e.
Kazu foun ohin 43, maihosi Dili na’in 13, Baucau 20 no munisípiu seluk na’in 10 kompostu hosi mane 23 no feto 20.
Hosi totál kazu detetadu foun ohin, ho idade 20 iha na’in haat (9,3%) entre tinan 12-59 na’in 39 (90,6%), idade 60 laiha, iha na’in 17 ka 39,9% sintomatiku.
Kumulativu kazu konfirmadu sura hosi 21 marsu 2020 to’o 30 setembru 2021 hamutuk 19.498. Hosi horisehik mai ohin, teste ne’ebé Laboratóriu Nasionál Saúde halo hamutuk 140, PCR, ho detallu hanesan tuir-mai, Vijilánsia sentinela na’in-ida, rastreiu ba kontaktu ka Contact tracing haat, Rastreiu Aleatóriu ka Random Screening nain 13, viájen sai-hosi serka sanitária hosi Dili 52, Viájen internasionál 32, Follow up iha kuarentena na’in 38.
Totál testes PCR ne’ebé halo horisehik 29 setembru iha munisípiu-sira seluk, RAEOA no HNGV hamutuk 302, ho detalla hanesan tuir-mai, Maubisse 11, Maliana 11, Viqueque hitu, Suai 22, Baucau 128, Ermera neen, RAEOA hitu, HNGV 82 no Lospalos 26.
Totál doze vasina ne’ebé fó ona ba populasaun elijível tinan 18 ba leten, to’o ohin dader 10:00, loron 30 setembru tuir sistema informasaun Saúde iha Ministériu Saúde ho totál kumulativu 1ª doze iha Dili (78,4%) no totál kumulativu 2ª doze iha Dili (68,0%).
Ema ne’ebé simu ona vasina doze dahuluk iha Timor-Leste (59,2%)no simu ona doze daruak (36,6%).
Atu bele hatene surtu ida ninia evolusaun no mós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.
Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.
Hosi insidénsia COVID-19 iha Timor-Leste, durante loron hitu ikus maka 2,5/100 mil abitante, enkuantu ba de’it munisípiu Dili 4,5/100 mil abitante. Ohin, Baucau iha insidénsia 6,3/100 mil abitante no RAEOA iha innsidénsia 5,9/100 mil.
Dadus iha leten hatudu katak, insidénsia munisípiu Dili, Baucau no RAEOA tuir-tuir malu as-liu, iha Timor-Leste laran tomak, hatudu risku as-liu, atu populasaun hetan da’et, no hada’et tutan virus SARS-CoV-2, iha komunidade nia le’et.
Iha loron 30 setembru 2021, izolamentu Vera Cruz, Lahane, HNGV no fatin seluk iha territóriu laran tomak, halo tratamentu hospitalizadu ba kazu detetadu pozitivu na’in 41, ho detalle hanesan tuir-mai, grave na’in-tolu, na’in-ida uza ventiladór, na’in-rua uza continuous positive airway pressure. Moderadu na’in 29 no kaman ema na’in-sia.
Jornalista: Felicidade Ximenes
Editór: Cipriano Colo
