DILI, 01 outubru 2021 (TATOLI) – Iha sesta kalan, fim-de-semana ne’e, akontese kontra ataké entre ekipa rua iha kampu FALINTIL-Forsa Defeza Timor – Leste (F-FDTL), Fatuhada Dili.
Iha kontra ataké, iha ámbitu jogu kontinuasaun Pra Liga Futsal Timor – Leste jornada 12 ne’e, ekipa rua; São Francisco ho Ramelau FC, iha kampu laran, ikusmai ‘sorte’ haliis ba Ramelau FC. Katak, maske esforsu oioin São Francisco halo maibé Ramelau FC mak tenke sai manan-na’in.
Ramelau FC sai manan-na’in tanba durante jogu, hahú arbitru lian to’o finál, Ramelau FC marka golu haat enkuantu São Francisco golu rua de’it (2-4).
Nune’e ho derrota ne’ebé ekipa São Francisco hetan, ekipa ne’e laiha direitu absoluta hodi hetan pontu tolu atu ultrapasa ba oin no tenke serbisu maka’as iha jogu sira tuirmai. Maibé, diferente ho Ramelau FC, tanba iha direitu absoluta ba pontu tolu hodi ultrapasa ba oin no tenke serbisu maka’as hodi gaña hela de’it vitória tanba jogu sei naruk.
Vitória ne’ebé Ramelau FC hetan, kontribui husi golu ne’ebé suta husi jogadór Zequel Pinto iha minutu ’10, Evinho Guterres ’15, ’32 no Joel Baptista ’37.
Enkuantu golu São Francisco Xavier nian hatama hosi jogadór Gaudêncio Fernandes iha minutu ’19, Agostinho Soares ’38.
Tanba ne’e, ho rezultadu ne’ebé mak iha hatudu katak Ramelau FC ultrapasa golu rua husi ekipa São Francisco, alias, 2-4. Nune’e, obrigadu Ramelau FC mak tenke sai manan-na’in iha Pra Liga Futsal Timor – Leste jornada 12, iha sesta kalan ne’e.
Notísia relevante:Pra Liga Futsal Timor-Leste, Ramelau “hurulele” AD Samoro 4-1
Jornalista: Hortêncio Sanchez
Editór: Rafy Belo
