DILI, 04 outubru 2021 (TATOLI)-–Reponsável másimu ba grupu produsaun Fitun Matebian, ne’ebé prodús mina-virjen, Justinho Barboja Pereira, husu Governu atu kria laboratóriu nasionál ba teste produtu orgániku, nune’e timor-oan bele prodús barak no fa’an iha merkadu internasionál.
“Ami rekomenda ba Governu kria laboratóriu nasionál kona-ba oinsá halo teste ba produtu hanesan mina-nuu sai mina-virjen no produtu orgániku sira seluk. Tanba durante ne’e ita atu identifka loloos produtu ne’e kualidade ka lae ita sidauk hatene loloos, tanba ita-nia laboratóriu ba teste produtu sira seidauk iha, ita ba fali halo teste iha ema-nia rain,” Produtór mina-virjin, hateten ba Agência TATOLI, iha Lecidere, segunda ohin.
Tuir nia, produtu orgániku hanesan mina virjen, ne’ebé atu fa’an iha rai-li’ur, ninia regra maka presiza sertifika produtu orgániku.
“Ita presiza ida-ne’e maka bele asesu ba merkadu internasionál, maibé daudaun ne’e ita laiha laboratóriu ba teste produtu orgániku sira, ida-ne’e maka difikulta ba ami tanba labele fa’an produtu ba rai-li’ur,” Reponsável másimu grupu akresenta.
Aleinde ne’e, rekomendasaun seluk hosi Justinho Barboja ba Governu mak kondisaun estrada iha área rurál ne’ebé difikulta transportasaun sasán ba merkadu.
Jornalista : Natalino Costa
Editora : Julia Chatarina
