Profisionál saúde liña frente hamutuk rihun hitu
DILI, 06 outubru 2021 (TATOLI)— Daudaun ne’e lista profisionál saúde ba liña frente hamutuk rihun hitu maibé bainhira la vasina mak sei la simu subsidiu liña frente nian.
“Lista profisionál saúde ba liña frente hamutuk rihun hitu. Agora rekizitu ne’ebé mak elijivel atu simu subsídiu mak profisionál saúde sira tenki vasina. Se sira la vasina mak nia la iha direitu ba subsidiu,” Diretora Nasionál Rekursu Umanu Ministériu Saúde (MS) Tomasia de Sousa hateten iha nia knaar fatin MS, Caicoli, ohin.
MS liuhusi parte rekursu umanu sei verifika dadus no tuirmai lori ba Ministériu Finansa halo pagamentu.
“Husi númeru rihun hitu ami sei haree fila fali tanba situasaun COVID-19 ne’e mai rekruta profisionál saúde hodi apoiu ba vasinator iha munisípiu hotuhotu ezetu RAEOA tanba RAEOA ami apoiu ba iha saúde iha família maibé ba iha 12 munisípiu ne’e ami apoiu ekipa ba vasinator tanba ami-nia ema ne’ebé mak apoiu ba vasina ne’e hamutuk 800,” nia informa.
“Entaun lista sira husi munisípiu sira haruka mai no balun seidauk haruka mai entaun husi nasionál verifika lai tuir rekezitu ka lae atu nunue’e ajusta ona iha despaxu ministeriál hafoin halo pagamentu tanba Diretór sira husi minisípiu no diresaun relevante sira nia lista hatama hotu ona no balun ami verifika no balun seidauk tanba ne’e mak parte Ministériu Saúde seidauk submete ba Ministériu Finansa”.
Notísia relevante:MS sei konklui lista liña frente iha tempu badak
Jornalista : Felicidade Ximenes
Editór: Rafy Belo
