DILI, 05 outubru 2021 (TATOLI) – Ekipa futeból klube futsal Ramelau FC mantein iha nia pozisaun hodi tau aas nia dignidade hanesan duni foho Ramelau nia aas ida be aas duni iha Timor–Leste. Ekipa Ramelau aas liu iha klube hotu iha Pra Liga Futsal Timor – Leste ho Pontu ne’ebé aas liu klube sira seluk.
Ramelau kontinua konsistente iha nia jogu tanba tau nia aan hanesan ekipa forte. Iha ne’ebé iha tinan kotuk bainhira jogu futsal la’o too agora Ramelau nunka lakon iha jogu ida kontra nia adversáriu sira. Ekipa ne’e mantein nia “losers” iha tabela klasifikasaun provizóriu.
Hosi rezultadu ohin kalan iha kampu futsal FALINTIL-Forsa Defeza Timor – Leste (F-FDTL) Fatuhada Dili hasoru malu entre ekipa Ramelau no Coelho FC maibé ekipa ne’e la hakru’uk ba nia adversáriu hodi rezulta duni vitória ho eskoru 3-2 hodi defende pontu tolu (3) la fó ba ekipa seluk.
Bainhira jogu hahú ekipa Coelho halo presaun maka’as ba Ramelau hodi book aan la di’ak. Haree ba jogu ne’e manas liután Ramelau kontinua kalma hodi hamate tutuir jogu moris ne’ebé Coelho lansa.
Hosi jogu ne’ebé ekipa rua ne’e halo iha kampu ninin nakonu ho adeptu hosi parte rua ne’ebé tabele iha rede-lolon hodi hakilar, forsa… Ramelau….!! Forsa sente atu doko rahun de’it rede ne’ebé dada hodi asegura kampu tanba hare ba jogu ne’ebé rame tebes.
La’ós Ramelau nian de’it, hosi parte liman loos iha adeptu hosi Coelho nian fó apoiu maka’as hodi hakilar lian-makas sadik malu ho adeptus Ramelau nian hodi hein golu ruma sei akontese.
Estratéjia ne’ebé Ramelau halo la hela de’it hanesan estratejia maibé hatudu rezultadu tanba to’o iha minutu 18 jogadór José da Costa lansa duni golu primeiru hodi hatuur rezultadu ba 1-0.
Hosi golu ne’e, halo adeptu sira Ramelau nian hakilar to’o atu mate de’it fó korajen liután ba sira-nia ekipa favoritu. Hein…. Hein! Ramelau nia golu mai, adeptu sira ne’e hakilar ho kontente.
Golu ne’e mak hanesan golu ne’ebé termina minutu primeira parte tanba to’o minutu 20 termina laiha tan golu ruma mak akontese ba ekipa rua ne’e.
Deskansa tiha minutu 10 atu jogadór sira bele dada iis no hemu be’e atu aguenta hikas iha minutu 20 ba segunda parte nian. Bainhira minutu segunda parte hahú ekipa rua nafatin halo kontra ho atake ba malu ho enerjétiku tanba iha adeptu ne’ebé halo rame ba ekipa rua ne’e.
Kontente ne’ebé Ramelau iha hatudu duni prova iha minutu 23. Jogadór Zequel Pinto lansa golu segundu ho velosidade maka’as ba rede Coelho halo guard- rede Leandro Magno halai sala no bola tama liu ba rede-laran eskoru metin kedan ba 2-0.
Coelho la nonok de’it kontinua esforsu aan maka’as. Jogadór sira la sente kole nafatin iha esperansa hodi luta atu halo netik golu ruma.
Luta ne’e sai duni realidade ba Coelho liuhosi nia jogadór Rivaldo Pereira pintas bola iha kampu laran hamonu jogadór na’in rua Ramelau nian, José Rodrigues no Evinho Belo hodi ultrapasa ba rede Ramelau nia oin hodi marka golu furak ne’ebé halo guarda-rede Domingos Gama labele salva, to’o ikus golu muda kedan rezultadu ba 2-1.
Ramelau kalma hodi mantein nia pozisaun liuhosi unidade entre jogadór sira iha kampu laran. La imajina, iha minutu 34 Zequel Pinto lansa sutu ida ho derepente ba rede Coelho hosi lina klaran halo jogadór hotu hakfodak to’o guarda rede Leandro Magno labele salva no hamriik hateke tuir de’it rezultadu nakfilak kedan ba 3-1.
Haree ba minutu ne’ebé besik termina ona Ramelau fiar-metin ho esperansa sai ona vensedór, maibé Coelho halo presaun maka’as to’o ikus iha minutu 39 ne’ebé atu termina ona jogadór António Ximenes lansa tan golu ida hodi muda rezultadu ba 3-2 no árbitru hú kedan árbitu hodi termina jogu no Ramelau mak sai hanesan vensedór.
Iha tabela klasifikasaun provizóriu Ramelau hanesan ekipa ida ne’ebé pontu aas liu kompara ho ekipa sira seluk. Totál pontu ne’ebé Ramelau rekolla ba jogu ida ohin kalan hamutuk 39 kompara ho ekipa seluk 31 ba kraik.
Pontu ne’ebé ekipa sira seluk rekolla durante ne’e mak hanesan, Mauputar FC 31. Mushila FC 30. Becusse United FC 27. Boa Sorte FC 25. Caesardante FC 23. Boavista FC 21. São Francisco Xavier 21. Coelho FC 20. Santa Cruz FC 19. AD Samoro 18. Bermeta FC 15 Estrela Baguia 15. Jerman FC 15. Gamer 13. M-VDL 13.BTAL FC 12. FC Maudoko 12. Crazy Hourse FC 11.FIEL FC 7. Kuda Ulun FC 7. Baucau All Star 5.Kablaki FC 4 no Academica FC 2.
Jornalista: Hortencio Sanchez
Editór: Rafy Belo
