DILI, 10 novembru 2021 (TATOLI)– Ekipa Emmanuel FC susesu iha nia jornada ikus kontra Ultramar FC, ne’ebé hala’o iha Estadiu Munisipál Dili kuarta loraik, ho skore 6-0.
Hosi rezultadu ne’e fó oportunidade ba Emmanuel FC lidera permanente grupu B ho pontu 12 no Ultramar obrigadu tenke tun ba pozisaun segundu tanba pontu 10 de’it.
Notísia relevante: Academica-Ultramar lidera tabela klasifikasaun segunda divizaun
Tanba ne’e, Emmanuel mak iha direitu absoluta hodi hasoru malu ho nia adversariu ne’ebé lidera grupu A Academica FC iha final segunda Divizaun hodi buka kampiaun.
Bainhira halakon Ultramar durante minutu 90, Emmanuel ne’ebé lidera hosi treinadór Emilio da Silva halo estratejia ne’ebé adekuadu tebes halo ekipa ne’ebé lidera hosi Moises da Silva book an la di’ak too han golu hamutuk neen.
Iha minutu primeira parte hahú ekipa rua lansa kontra no atake ba malu ho ritmu ne’ebé makas. Emmanuel halo jogu ho kontra no atake ne’ebé makas hakarak halo golu lais, enkuantu Ultramar mós hanesan.
Ho esforsu ekipa rua nian hosi minutu 1 to’o 25 labele halo golu ruma tanba forsa entre ekipa rua hanesan no la fó ameasa ba malu.
Hakur ba minutu 27 oportunidade di’ak mosu ba Emanuel hodi realiza sira nia ambisaun hatama golu, hosi jogadór Alexandre Morreira (9) hodi muda rezultadu ba 1-0.
Golu ne’e halo mentalidade Ultramar komesa monu daudaun, nune’e iha minutu 35 jogadór Emanuel Alexandre Morreira nafatin halo golu ida muda, bainhira bola barullu iha lia Ultramar nia oin hodi muda skore 2-0
Ultramar iha ambisaun makas hodi hatudu jogu, maibé jogadór Emanuel tenta hamate tutuir jog, nune’e iha minutu 38 Filomeno Xavio fura tan rede Ultramar ba 3-0.
Golu ne’e, hanesan golu ikus iha minutu primeira parte no laiha tan golu ruma mak akontese no Emanuel provizóriu lidera jogu.
Dolar ba segunda parte ekipa rua nafatin hatudu jogu ne’ebé di’ak, sorte aat monu nafatin ba Ultramar tanba iha minutu 59, Mario Quintão lansa tan golu ida hodi muda rezultadu ba 4-0.
Treinadór Moises da Silva tur la hakmatek uza maneira oioin atu hamate Emanuel nia jogu maibé jogadór Emanuel sira antisipa ho di’ak tebes hodi la fó leet ba Ultramar atu halo golu.
Ekipa ho jersi mean domina iha kampo laran duir bola hosi ain baa in halo tiki taka ba mai hodi provoka Ultramar nia emosaun hodi joga la tuir orientasaun treinadór nian.
Ho fallansu ne’ebé Ultramar komete fó risku ba sira nia ekipa no hakoi rasik sira nia ambisaun no esperansa hakarak manan Emanuel.
Jogu la’o to’o minutu 66 jogadór Filomeno Xavio halo tan golu ida muda rezultadu ba 5-0. Nune’e mós iha minutu 88 Zeferino Nheu (18) realiza golu ikus liu husi sutu falta iha lina oin Ultramar nian no bola tama ba rede hodi muda skore ba 6-0.
Jogadór Ultramar nian barak mak joga ho emosaun ne’ebé makas nune’e iha minute 88 jogadór Lesi Atok komete erru ne’ebé makas iha kampu laran hodi tebe monu jogadór Emanuel, Jonatas Pereira (7) árbitru foti desizaun sériu fó kartaun mean.
Ho erru ne’ebé iha halo Ultramar nia jogadór hela de’it na’in 10 mak iha kampu ne’ebé Emanuel la fó oportunidade ba sira lansa golu to’o minutu 90 termina.
Jogu ne’e dirije hosi árbitru Francisco Pereira, juiz liña Filomeno da Silva, João Paulo da Costa no árbitru rezerva Fernando Matos.
Notísia relevante: Emmanuel FC prontu kompete iha jogu époka 2021
Jornalista : Hortencio Sanchez
Editór : Florencio Miranda Ximenes
