BOBONARO,13 outubro 2021 (TATOLI)— Conselho de Imprensa (CI) no Centro Nacional Chega (CNC) serbisu hamutuk ho atutoridade munisípiu Boboaro, organiza feira produtu lokál iha ámbitu komemorasaun trajédia Balibo Five ba dala-46.“Ita hahú loke feira atu komunidade sira bele mai fa’an sira-nia sasán hanesan hahán ka produtu lokál ne’ebé sira iha, ida-ne’e hanesan baze konseitu ne’ebé CI ho CNC hakarak promove Balibo hanesan sidade Liberdade,” Prezidente CI, Virgílio da Silva Guterres, ko’alia iha Balibo, kuarta ne’e.
Produtu lokál ne’ebé komunidade sira halo promosaun iha feira ne’e mak hanesan, ai-han lokál fehuk, talas, ai-farina no fore-rai.
Nune’e mós produtu artezenatu hanesan pasta-tais, xapeu homan ho tali, tais orijinál Balibo, estátua, kelu ne’ebé mai hosi kreatividade komunidade Balibo rasik.
Totál grupu ne’ebé partisipa iha feira ne’e hamutuk 20 ne’ebé kolokadu iha tenda hira-ne’ebé prepara ona hosi komisaun organizadora.
Iha feira ne’e tenda ida prepara hosi PNTL hosi fasilita pesoál saúde sira halo atendimentu ba komunidade ne’ebé hakarak simu vasina. Tuir ajenda atividade feira produtu lokál ne’e hahú iha loron 13 no finaliza iha loron 16 outubru.
Maria Amaro nu’udar negosiante tais, sente kontente no agradese ba CI no CNC tanba fó ona oportunidade halo promosaun ba sira-nia produtu iha feira ne’e.
“Bele valoriza ona ami-nia produtu, no feira ida-ne’e benefísia tebes mai ami, tanba durante períodu COVID-19 ami-nia produtu sira-ne’e la folin, no ami espera ho atividade ida-ne’e sasán sira-ne’e bele hotu, hodi aumenta ami-nia rendimentu ba nesesidade uma-laran,” nia katak.
Tuir komisaun eventuál katak atividade komemorasaun trajédia Balibo Five ba dala-46 ne’e hahú uluk iha loron 12 ho kampaña nasionál vasinasaun iha suku Leohitu, no iha loron 13 outubru kalan sei halo abertura ba exibisaun fotografia no diálogu ho autoridade munisíapal Bobonaro. Iha abertura ne’e mós ko’alia kona-ba konseitu harii Balibo hanesan sidade lliberdade.
Nune’e mós diálogu ne’e sei transmite direita iha kanál RTTL, hodi halo intervista intervista eskluzivu ho sasin moris no família vítima kona-ba trajédia sira-ne’ebé akontese iha fronteira Bobonaro. Ikus liu sei taka ho atribuisaun premiu ba jornalista sira iha loron 16 kalan. Orsamentu ne’ebé gasta ba selebrasaun ne’e ho rihun $35 inklui apoia hosi doadór balun.
Membru governu ne’ebé konfirmadu atu partisipa mak hanesan Ministru Prezidénsia Konsellu Ministru, Fidelis Manuel Leite Magalhães, Ministru Administrasaun Estatal, Miguel Pereira de Carvalho, Sekretáriu Estadu Komunikasau Sosial, Mericio Juvinal dos Reis Akara.
Nune’e mós Premiadu Novel da Pás, Jose Manuel Ramos Horta, maibé eis xefe estadu ne’e seidauk komfirmadu tanba sei iha estranjeiru.
Komisaun organizadora ne’ebé organiza hosi CI no CNC distribui hotu ona Komvite ba diplomata estranjeira sira iha Timor-Leste, hanesan Embaixadór Austrália Piter Robert no seluk tan.
Jornalista na’in-lima lakon vida 16 outubru 1975 ne’e mak hanesan Greg Shackleton (reporter),Tony Stewart (gravadór lian), Garry Chunningham (operadór kamera) hosi mídia HSV-7 (Seven network) Melbroune, Brian Peters (operadór kamera) no Malcolm Rennie (reporter) hosi mídia TCN-9 (Nine network) Sidney.
Jornalista: Sérgio da Cruz
Editor: Evaristo Saores Martins
