OÉ-CUSSE, 14 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), prepara ona tratór unidade hitu (7) atu apoia komunidade fila-rai gratuita iha área produtivu molok udan monu-rai.
“Dezde iha fulan-setembru, diresaun agrikultura halo ona manutensaun ba tratór sira, atu prepara fila-rai ba komunidade sira-nia área produtivu, daudaun ne’e ita-nia tratorista sira preparadu ona atubele apoiu komunidade ba fila-rai gratuita, tanba besik udan monu-rai ona,” Sekretáriu Rejionál ba Asuntu Agrikultura, José Eta, informa ba Agência TATOLI, iha edifísiu agrikultura, Oé-Cusse, kinta ne’e.
Oras ne’e diresaun agrikultura, hein hela pedidu hosi komunidade hafoin bele halo operasaun iha terrenu, maibé to’o fulan-outubru ne’e, seidauk iha pedidu ruma kona-ba programa fila-rai ne’e.
“Ita destaka ona tratorista sira iha kada sub-rejiaun sira, Oésilo, Pante Makasar no Nítibe la-inklui Pásabe. Ita espera komunidade sira hamutuk ho lideránsa komunitáriu, karik presiza tratór atu fila-rai, entaun aprezenta ona karta pedidu nune’e tratorista sira hahú halo operasaun, tanba besik udan monu-rai ona,” nia fó hanoin ba komunidade.
Iha tinan kotuk, programa fila-rai ne’e kontribuisaun hosi agrikultór sira hanesan, autoridade prepara fasilidade tratór ho tratorista no komunidade maka prepara gazoel. Maibé iha tinan ne’e autoridade sei fasilita gratuita, tanba ligada ho dezastre naturál siklone tropikál seroja iha 4 abríl, afeita komunidade nia área produtivu.
Nia fó-sai katak, tinan ne’e diferente autoridade prepara ona kombustível gazoel hamutuk rihun $50 atu apoia programa fila-rai gratuita ba komunidade, no iha tempu badak sei halo tenderizasaun ba empreza ne’ebé sei fornese kombustível ba tratór sira ba programa fila-rai gratuita ne’e.
“Tempu ona atu aprezenta pedidu, nune’e tratorista sira bele mobiliza daudaun ona, atubele destaka ona iha sub-rejiaun Oésilo, Pante Makasar no Nitibe, tanba besik udan monu-rai, sei difikulta estrada no sei la-kobre ba área hotu iha sub-rejiaun sira, entaun tempu fila-rai mak iha outubru ho novembru,” nia informa.
Jornalista : Abílio Elo Nini
Editór : Evaristo Soares Martins
