OÉ-CUSSE, 14 outubru 2021 (TATOLI)—Xefe Departamentu Solidariedade Sosiál no Inkluzaun-Rejiaun Administrativa Espesiál Oé-Cusse Ambeno (RAEOA), Adelino Cau, fó-sai katak, pagamentu idozu-invalidés ba faze dahuluk rejista benefisiáriu na’in-24 seidauk simu direitu osan idozu-invalidés tanba iha fallansu téknika.Nune’e, Ministériu Solidariedade Sosiál no Inkluzaun, prosesa ona sei simu iha pagamentu faze daruak, tinan ne’e.
“Ita-nia ekipa téknika sira, rejista lista pendente seidauk simu osan idozu-invalidés hamutuk na’in-24. Sira-nia osan tama ona iha konta bankária maibé, iha sistema mak hamosu fallansu téknika uitoan entaun daudaun ne’e sei prosesa hela,” Adelino Cau informa ba Agência TATOLI, iha Santa Rosa, Oé-Cusse, kinta ne’e.
Nune’e, fallansu ne’e, Serbisu Solidariedade Sosiál no Inkluzaun RAEOA, relata ona ba iha minstériu, no tuir rezultadu konsulta katak, benefisiáriu na’in-24 ne’e sira sei simu sira-nia direitu iha pagamentu faze daruak tinan ne’e.
“Sira-nia osan la-lakon, osan iha banku hela, maibé tanba ne’e prosesu administrasaun osan Estadu nian, ita tenke hatuur loloos osan ne’e tuir dokumentu ne’ebé mak iha, maibé iha ona konfirmasaun katak, benefisiáriu 24 ne’e sei simu hotu iha pagamentu faze daruak,” nia informa.
Nu’udar dirijente Departementu Solidariedade Sosiál no Inkluzaun iha RAEOA, nia apela ba benefisiáriu na’in-24 atu pasiensia, hodi hein to’o pagamentu faze daruak, tanba Governu sei selu hotu direitu ba idozu tuir lista ne’ebé maka submete ona iha nasionál
Entretantu, pagamentu idozu-invalidés hahú iha 23 fulan-juñu hosi sub-rejiaun Nítibe, kontinua ba sub-rejiaun Pásabe no Oésilo, no ensera iha iha sub-rejiaun Pante Makasar, iha (12/10) ne’e.
Totál benefisiáriu idozu-invalidés iha RAEOA ba tinan 2021, ba pagamentu faze dahuluk hamutuk 6.471 kompostu hosi sub-rejiaun Nítibe 1.286, sub-rejiaun Pásabe 733, sub-rejiaun Oésilo 1.394 no sub-rejiaun Pante Makasar 3.058.
Jornalista: Abílio Elo Nini
Editór: Evaristo Soares Martins
