BOBONARO,15 outubro 2021 (TATOLI)—Banku Nasionál Komériu Timor-Leste (BNCTL, sigla Portugues) planeia oferese kréditu ba feto sira-ne’ebé fila-liman iha área rurál hodi hakbiit sira-nia negósiu.
“Ida-ne’e ita foin planu, bainhira ami lansa ona mak, ami-nia membru sukursál sira iha munisípiu sei ba fahe informasaun iha ita boot sira-nia iha suku, atu ita-nia inan feto rurál sira bele hakbesik-an mai banku,” Diretór Ezekutivu BNCTL, Brigídio de Sousa, ko’alia asuntu ne’e durante sai oradór iha ámbitu selebrasaun loron internasionál feto rurál tinan 2021, suku Miligo, postu administrativu Cailaco, sesta ne’e.
Nia informa ba inan-feton sira katak, oras ne’e BNCTL esforsu hela prosesu no espera iha tinan oin lansa ona ba inan feto rurál sira-ne’ebé hakarak asesu.
Nia fó-sai katak, rekizitu ba asesu produtu ne’e, grupu feto rurál sira tenke iha fatin própriu no garante katak atividade negósiu tenke la’o.
Nune’e mós grupu koperativa sira-ne’ebé durante ne’e apoia feto rurál sira, sei rekomenda ba BNCTL, hodi ba trata dukumentu iha edifísiu BNCTL nia sukursál sira-ne’ebé estabelese iha munisípiu 12 no Rejiaun Administrativu Espesiál Oé-cusse Ambeno (RAEOA).
Diretór Ezekutivu BNCTL ne’e esplika, kréditu ne’e ho ninia jurus kiik, ezemplu $50 sentavu bele hetan kedas nia funan, no funan aasliu kompara ho depozitu sira agora ne’e.
Nia dehan, dalaruma nia funan bele hetan 1%, no ba iha kréditu mós hanesan ninia funan kiik, másimu 6% ba kualkér negósiu ne’ebé inan-feto sira atu halo.
Ikusliu, nia apela bai nan-feton sira iha Cailaco katak, atu implementa produtu ne’e BCNTL sei koordena ho grupu koperativa sira, oinsá atu identifika tipu negósiu ne’ebé grupu sira halo, iha suku no aldeia ne’ebé merese duni atu asesu.
Jornalista : Sérgio da Cruz
Editór : Evaristo Saores Martins
