DILI, 16 outubru 2021 (TATOLI)—Aviaun Asia Cargo Airlines ho marka PK-MGZ to’o iha Aeroportu Internasionál Prezidente Nicolau Lobato, Comoro, sábadu ne’e, tuku 17:30, lori vasina Pfizer doze 100.620.
Vasina ne’e oferese hosi Estadu Unidu Amérika (EUA) liuhosi COVAX, ho koordenasaun United Nations Children’s Fund (UNICEF), ne’ebé simu diretamente hosi Enkaregadu Negósiu Embaixada EUA, Tom Daley, Ministériu Edukasaun Juventude no Desportu (MEJD), Armindo Maia, Reprezentante UNICEF iha Timor-Leste, Bilal Durrani no entidade relevante seluk.
Enkaregadu Negósiu Embaixada EUA iha Timor-Leste, Tom Daley, hateten, vasina Pfizer ba dahuluk uza iha Timor-Leste no hanesan oportunidade dahuluk mós ba labarik sira hodi bele lalais no efetivamente vasinadu hasoru COVID-19.
“Vasina COVID-19 ida-ne’e, seguru no efetivu no oferese ba povu Timor-Leste ho gratuita no vasina ida-ne’e mak uza mós iha Estadu Unidu Amérika. Ami hamriik hamutuk ho Timor-Leste hanesan belun no parseiru rohan laek atu serbisu hamutuk kombate COVID-19, entaun vasina ne’ebé ohin to’o mai ne’e demonstra ami-nia apoiu ba esforsu Governu atu salva timor-oan sira nia vida, partikularmente ba labarik ho tinan 12-17,” Reprezentante EU, hateten iha Aeroportu Comoro.
Notísia relevante: Sábadu, vasina Pfizer doze 100.620 to’o Timor-Leste
Tanba ne’e, EUA orgullu bele oferese vasina Pfizer ba Timor-Leste, tanba hanesan asaun loloos atu hakotu pandemia COVID-19, atubele hakat liu kedas ba rekuperasaun ekonómika.
Tuir Enkaregadu Negósiu Embaixada, desde inísiu pandemia ne’e, EUA serbisu hamutuk ho Governu Timor-Leste hodi oferese millaun $5,9 hodi kombate COVID-19, ne’ebé adota abordajen abrajente atu hakotu pandemia ne’e iha mundu tomak, mitiga impaktu negativu ba ema no sosiedade hodi haforte rekuperasaun globál tanba nasaun ne’e firme ho ninia promesa atu sai ‘armazen’ vasina ba mundu tomak.
“Ami orgullu sai hanesan doadór boot liu iha COVAX. Kontribuisaun EUA hamutuk biliaun $4 ho tan fundu seluk hosi Governu EUA, ne’ebé utiliza ona hodi sosa vasina Pfizer doze millaun 500 hodi distribui liuhosi COVAX ba nasaun sira ne’ebé ho rendimentu kiik no médiu, bazeia ba kritériu ne’ebé define hosi Gavi’s Advance Market Commitment no Uniaun Áfrika,” nia subliña.
Iha loron 22 setembru, Prezidente EUA, Joe Biden, kompromete atu oferese tan vasina Pfizer adisionál hamutuk doze millaun 500, hodi disponibiliza doze biliaun 1,1 resin.
EUA kontinua serbisu hamutuk ho COVAX no parseiru seluk atu asegura vasina sira ne’e distribui ho justu no haktuir dadus sientífiku no saúde povu nian.
MEJD agradese ba kooperasaun
Iha fatin hanesan, Ministériu Edukasaun Juventude no Desportu (MEJD), Armindo Maia, agradese ba kooperasaun ne’ebé fasilita hosi COVAX no UNICEF, hodi bele lori vasina Pfizer to’o Timor-Leste.
“Vasina Pfizer ne’ebé ohin to’o ona Timor-Leste, fó benefísiu ba ita-nia labarik sira hamutuk 50.000, tanba durante ne’e ita halo ona preparasaun hamutuk ho Ministériu Saúde, espera tempu badak bele halo ona lansansamentu,” nia akresenta.
Tanba ne’e, Ministru husu ba inan-aman atu motiva oan sira, nune’e labarik hotu bele simu vasina tanba liuhosi vasina ida-ne’e mak bele aumenta labarik sira-nia imunidade hodi kontra COVID-19 iha Timor-Leste.
Vasina Pfizer ba dahuluk uza iha Timor-Leste no sei destina ba ema ho idade 12 to’o 17, ne’ebé tuir planu sei implementa doze dahuluk iha Dili iha loron 25 outubru, ba estudante no la’ós estudante hamutuk 41.000.
Define mós katak, doze daruak hosi vasina ne’e sei administra ho intervalu loron 21.
Enkuantu to’o loron 15 outubru, iha nível territóriu tomak, rejista ona ema ho idade 18 ba leten ne’ebé simu ona vasina AstraZeneca no Sinovac ba doze dahuluk hamutuk 504.194 (66,8%) no doze daruak 322.439 (42,7%), ho totál kobertura 826.634.
Jornalista : Arminda Fonseca
Editora : Julia Chatarina
