MS lansa vasina Pfizer doze dahuluk iha munisípiu Dili no Liquiça
DILI, 18 outubru 2021 (TATOLI)—Ministra Saúde, Odete Maria Freitas Belo, hateten, daudaun halo ona preparasaun lansa vasina Pfrizer doze dahuluk ba labarik ho idade 12 to’o 17 iha munisípiu Dili no Liquiçá.
“Ami halo preparasaun hili eskola iha munisípiu Dili no Liquiçá ba lansamentu vasina Pfizer iha loron 25 no 26 outubru,’’ Ministra Odete, hateten ba jornalista sira iha edifísiu SAMES, Kampu- Alor, segunda ne’e.
Tuir dadus labarik idade 12 to’o 17 ne’ebé mak eskola hamutuk rihun 100-resin no labarik ne’ebé mak la eskola hamutuk rihun 30-resin.
“Ita atu fó vasina ba labarik sira tenke disemina uluk informasaun kona-ba efeitu no ninia vantajen ba nia inan-aman no profesór sira atu lori labarik sira ba vasina,’’ Governante ne’e akresenta.
Iha biban hanesan, Enkarregadu Negosiu Embaxada Estadu Unidu Amérika iha Timor Leste, Tom Daley, afirma, lori povu Amerikanu apoia Timor Leste ho vasina Pfizer doze 100.620 ne’ebé ho seguru no efikásia ba labarik sira.
“Vasina sira ne’e sei proteze labarik hamutuk 48.000 iha Timor-Leste hasoru efeitu sira aat liu hosi COVID 19 tanba vasina sei salva ema nia moris no vasina sei lori normalidade ba timoroan sira hotu,’’ Diplomata EUA ne’e afirma.
Entretantu, Reprezentante UNICEF iha Timor-Leste, Bilal Durrani, sente orgullu tanba kumpre duni promesa ba labarik sira hotu iha Timor-Leste.
“Ha’u hatene katak dezafiu sira ne’ebé mak pandemia ne’e lori, afeta ona aspetu barak husi imi-nia moris sira, komesa husi saúde mentál ba to’o lakon oportunidade iha prosesu aprendijazen prolongamentu taka eskola sira,’’ nia hatutan.
UNICEF kontinua hatudu kompromisu ajuda labarik sira atu hetan benefisiu liuliu asesu ba serbisu saúde sira ho kualidade, prosesu aprendijazen, prevensaun ba má nutrisaun, hadi’a asesu ba bee, saneamentu no ijiene inklui halo advokasia ho polítiku sira atu proteje direitu labarik.
UNICEF mós kontinua halo akizasaun vasina Pfizer ho orsamentu billaun $4 ba mundu tomak inklui Timor-Leste.
Notísia relevante: 25 outubru, MS lansa vasina Pfizer doze dahuluk
Jornalista : Felicidade Ximenes
Editór : Florencio Miranda Ximenes
