OÉ-CUSSE, 19 outubru 2021 (TATOLI)— Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretaria Rejionál ba Asuntu Agrikultura, fó orientasaun atu reativa hikas prosesu aprendijazen iha Eskola Téknika Agrikultura Rejiaun Oé-Cusse (ETARO).
Durante ne’e Autoridade RAEOA uza ETARO nu’udar fatin kuarentena obrigatóriu ba pasajeiru sira-ne’ebé viajen hosi rai-li’ur no rai laran.
“Momentu ne’ebá autoridade seidauk iha fatin másimu, entaun ita deside uza ETARO sai kuarentena, hodi muda ita estudante sira hala’o ensinu aprendijazen iha Eskola Téknika Vokasionál Palaban, tama ho parte lokraik, maibé daudaun ne’e pasajeiru laiha ona, entaun ita sei reativa iha semana ne’e,” Sekretáriu Rejionál ba Asuntu Agrikultura, José Eta, informa ba Agência TATOLI, iha Oé-Cusse, tersa ne’e.
Maibé Sekretáriu Rejionál Asuntu ba Agrikultura ne’e sei koordena ho Sekretáriu Rejionál Asuntu Saúde, Manuel da Costa, hodi orienta ekipa saúde sira atu halo dezinfeta, tanba durante ne’e pasajeiru balu kumpre kuarentena obrigatóriu durante loron-14 no balu hetan pozitivu.
Purtantu Diretór ETARO, José Kehi, hateten, parte eskola simu ona informasaun, atu reativa maibé sei hein ekipa saúde sira halo dezinfeta ba sala sira.
“Ami simu ona informasaun katak iha semana ne’e, kinta ka sesta ami bele uza ona, maibé ami sei koordena ekipa saúde sira atu halo dezinfeta, ne’ebé espera iha semana ne’e bele muda ona ami ba ami-nia eskola,” nia tenik.
Totál estudante iha eskola téknika agrikultura RAEOA ne’e hamutuk na’in-142 ho totál profesór hamutuk na’in-21.
Jornalista : Abílio Elo Nini
Editór : Evaristo Soares Martins
