DILI, 19 outubru 2021 (TATOLI)– Iha jogu kontinuasaun Pra Liga Futsal Timor-Leste, jornada 16, ekipa FC Maudoko susesu hadau pontu tolu hosi nia adversáriu Caesar Dante ho rezultadu 5-3.
Iha jogu primeira parte ne’ebé hala’o iha kampu futsal FALINTIL-Forsa Defeza Timor-Leste (F-FDTL) Fatuhada, ekipa rua lansa kontra no atake ho tékniku duir bola hosi ain ba ain atu buka vitória.
Kontra no atake ne’e fó oportunidade ba Caesar Dante lansa golu dahuluk ba Maudoko hodi muda skore 1-0, iha minutu tolu hosi jogadór Denato Amaral.
Ekipa Maudoko la hakfodak ho golu ne’e, nune’e jogadór sira kontinua hatudu jogu bonitu iha kampu laran. HO esforsu hirak ne’e la hela de’it ho esforsu tanba iha minutu haat jogadór, Ricky Fernandes responde golu hodi muda rezultadu ba 1-1.
Ho rezultadu provizóriu empate ne’e, halo jogu sai manas liután tanba Caesar Dante domina bola hodi aperta Maudoko, maibé Maudoko hatudu jogu ho kalma no la ansi halo golu bainhira seidauk hetan oportunidade.
Dolar ba iha minutu 10, jogadór Juninho Lucas fura tan rede Caesar Dante hodi hatur rezultadu ba 2-1.
Ho golu ne’e, defeza Maudoko ladun kontrola bola ho di’ak hodi fó oportunidade ba Caesar Dante hodi hatama golu, iha minutu 16 liuhosi jogadór Leonildo Torres halo rezultadu empata ba 2-2.
Hakuur ba segunda parte ekipa rua nafatin lansa kontra no atake ba malu, maibé jogadór Caesar Dante antesipa bola ho di’ak liu, nune’e iha minutu 21, nune’e jogadór Leonildo konsege halo tan golu ida muda skore 3-2.
Ho skore ne’e, Maudoko hahú jogu makas liután, nune’e iha minutu 28, jogadór Mario Freitas responde golu ida hodi muda rezultadu 3-3.
Iha minutu 29, jogadór Maudoko Ricky hala’o jogu individu ho sériu hodi lansa tan golu ida ba Caesar Dante hodi muda skore ba 4-3.
Nune’e mós, hela de’it minutu ida atu termina jogu segundu parte, jogadór Tomas Taquino halo tan golu ikus hodi hatur metin rezultadu ba 5-3, hodi fó vitória ba ekipa Maudoko FC.
Notísia relevante : Mushila FC manán B’TAL 3-0
Jornalista : Hortencio Sanchez
Editór : Florencio Miranda Ximenes
