DILI, 20 outubru 2021 (TATOLI)– Liga Futeból Timor-Leste (LFTL), deside la fó autorizasaun no lisensa ba klubu Boavista FC Timor atu partisipa jogu époka 2021 tanba ho baze ba karta hosi klubu ne’e.
“Liga mantein nia pozisaun bazeia ba karta ne’ebé mak klubu Boavista FC hatama mai liga hodi deside la partisipa jogu primeira devizaun. Nune’e ita sei la aseita sira atu joga iha liga tinan ne’e,” Diretór Verifikasaun no Lisensa Liga Futeból Timor-Leste (LFTL), José Carvalho, hateten ba Agência TATOLI hafoin ramata reuniaun ho ekipa Boavista iha edifisiu Federasaun Futeból Timor-Leste (FFTL) Dili, kuarta ne’e.
Notisia relevante: LFTL simu ona karta hosi Boavista FC Timor
Tuir nia, la fó lisensa ho baze ba regulamentu interna Liga Futeból Timor-Leste (LFTL).
“Ami loke inskrisaun ba klubu sira atu mai rejistu hodi partisipa jogu époka tinan ne’e, maibé Boavista la mai rejistu no hatama fali karta hodi deside la tuir jogu,” nia akresenta.
Nune’e, LFTL mós fó dalan ba Boavista FC atu hatama rekursu ka lamentasaun ba parte jurídiku liga atu foti desizaun.
Iha biban hanesan, Jerente Klubu Boavista FC Timor, Ezy Leong, hateten, bainhira hetan autorizasaun hosi LFTL, klubu ne’e prontu atu partisipa jogu époka ne’e.
“Ohin, mai atu ko’alia karik liga autoriza, ami nia klubu no jogadór pronto no firme atu partisipa jogu iha primeiru devizaun, maibé sira la autoriza ami tenke tun duni ba segunda divizaun,” nia afirma.
Maski nune’e, Jerente klubu Boavista ne’e rekoñese desizaun-sira ne’ebé antes ne’e klubu foti hodi deside la partisipa jogu époka ne’e kontra regulamentu interna no afeta jogadór sira.
“Ami foti ne’e haree ba situasaun pandemia ne’e ho buat barak tan, maibé ami sei buka atu tenta nafatin oinsa ami bele partisipa, liga mós fó biban mai ami atu halo rekursu durante loron lima hatama ba parte juridiku. Maibé ami sei haree lai no labele nafatin ami tenke simu desizaun hosi liga,” nia afirma.
Notisia relevante: Abertura Liga Timor-Leste , Porto Taibesi manán Zebra FC 1-0
Jornalista: Hortencio Sanchez
Editót : Florencio Miranda Ximenes
