DILI, 21 outubru 2021 (TATOLI) – Jogu entre ekipa Kablaki FC ho Lica-Lica Lemorai FC ho rezultadu empate 1-1, fó sorte di’ak ba klubu Atletico Ultramar lidera provizóriu tabela klasifikasaun grupu B ho pontu haat, iha jogu segunda divizaun Liga Futeból Timor – Leste (LFTL).
Jogu ne’ebé hala’o, kinta loraik ne’e, iha kampu Federasaun Futeból Timor-Leste (FFTL) ekipa rua hatudu jogu bonito liuhosi tékniku no abilidade ho mehi atu hetan vitória.
Hahú jogu primeira parte ekipa rua fó presaun ba malu,maibé la’o iha minutu naruk nia laran la rezulta golu ruma.
Lika-Lika ne’ebé lidera hosi nia treinadór Gaspar Pinto konsege halo presaun makas hasoru Kablaki no iha minutu 43 jogadór Manuel do Carmo (11) konsege fura uluk rede kablaki ne’ebé la konsege salva hosi guarda rede Pablo de Jesus (20) hodi muda eskore ba 1-0.
Golu ne’e maka termina ona primeira parte tanba durante minutu balun jogadór sira halo presaun ba malu laiha tan golu ruma mak akontese ba ekipa rua.
Dolar ba segunda, Kablaki joga ho kalma la ansi halo golu bainhira seidauk hetan oportunidade, maibé Lica-Lica jogu ho ambisaun booit atu prodús tan golu maibé defeza Kblaki la fó fatin.
Jogu la’o naruk tebes Lica-Lica hanoin hetan vitória ona, maibé hanoin hirak ne’e la sai realidade tanba Kablaki sei iha esperansa atu halo empate jogu ne’e.
Nune’e, ho jogu ne’ebé kualidade jogadór Kablaki Angelito Oliveira (14) konsege hatama golu ida iha minutu 75 liuhosi bola sutu ho kalma ne’ebé guarda rede Lica-Lica, Luis Maubere la antisipa ho di’ak hodi rezulta golu ne’ebé muda eskore ba empate 1-1.
Nune’e to’o minutu segundu parte remata laiha tan golu ruma mak akontese, nune’e obrigado ekipa rua tenke fahe pontu ba malu, hodi fó oportunidade ba Atletico Ultramar lidera taleba klasifikasaun ho pontu haat.
Jogu ne’e, dirije hosi árbitru Eufrasio da Silva, juis liña Elisio Lopes no João Paulo da Costa, no árbitru rezerva Jorge Sarmentu.
Notísia relevante: Manán 3-2, Ultramar lidera provizóriu tabela klasifikasaun
Jornalista : Hortencio Sanchez
Editór : Florencio Miranda Ximenes
