OÉ-CUSSE, 26 outubru 2021 (TATOLI)— Komisaun Reguladora Arte-Marsiál (KRAM), tersa ne’e sensibiliza ba estudante sira iha Eskola Sekundária Jerál (ESG, sigla portugés) Palaban, Rejiaun Administrativa Espesiál Oé-Cusse Ambeno (RAEOA) nune’e kria ambiente pás iha sosiedade.
Objetivu prinsipál sensibilizasaun hosi KRAM ne’e kona-ba papél arte marsiál hodi motiva estudante sira hakribi violénsia no presiza kria amizade iha ambiente eskola tanba arte-marsiál ne’e la’ós buat aat, maibé nu’udar modalidade desportiva ba estudante sira aprende Taekwondo, Silat, Karate, no Boxin, kompete iha nível nasionál no iha internasionál.
“Labele uza arte-marsiál ne’e hodi hatudu liman ba-malu, maibé presiza kria ambiente no amizade entre joven sira iha ambiente eskola tanba imi mak futuru nasaun, hakribi violénsia no promove nafatin amizade nu’udar timór-oan,” Prezidente KRAM, Octavio da Conceição, ko’alia iha iha ámbitu sensibilizasaun iha Oécusse.
VIII Governu Konstitusionál liuhosi Sekretaria Estadu Joventude no Desportu iha politíka rua, foinsa’e mileniál forsa kriativa no re-integra organizasaun arte marsiál tuir rezolusaun númeru 4/2020 ba sosiedade.
Tuir nia, durante tinan barak joven sira-ne’ebé envolve-an iha arte marsiál balu uza sala, balu uza atu sukat forsa ba malu, mobiliza grupu, ataka grupu seluk, mobiliza malu, sunu uma, halo rama-ambon, ataka malu, maibé tuir loloos ne’e presiza hatudu talentu hodi promove modalidade ne’ebé joven sira iha.
“Oé-Cusse-oan tenke kuda-metin kultura Oé-Cusse nian tenke fó solidariedade ba malu, no respeitu malu nune’e garante estabilidade nasaun hodi kontribui ba dezenvolvimentu nasionál liuhosi modalidade desportu nian,” nia fó hanoin.
Vise-diretór Eskola Sekundáriu Jerál Palaban, Francisco Nono, agradese ba ekipa KRAM nasionál, tanba bele halo ona sensibilizasaun ba estudante sira, nune’e bele koñese kna’ar no responsabilidade nu’udar arte-marsiál
“Sensibilizasaun ne’e bele motiva joven sira atu hakribi violénsia maibé prezisa kuda domin ba malu nu’udar timór-oan,” nia katak.
Entretantu, partisipa iha sensibilizasaun ne’e mai hosi Prezidente sub-KRAM RAEOA, Sentru Juventude Rejiaun Oé-Cusse, PNTL no profesór no estudante hamutuk 774.
Jornalista : Abílio Elo Nini
Editór : Evaristo Soares Martins
